Қазақстанда автомобиль жолдарын салу және жөндеу кезінде анықталған заңбұзушылықтар бойынша 33 сотқа дейінгі тергеп-тексеру басталды. Бұл туралы үкімет отырысында бас прокурордың бірінші орынбасары Жандос Өміралиев мәлімдеді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Келтірілген залалдың алдын ала көлемі 8 млрд теңгеге жуық. «Сонымен қатар негізсіз шарттар мен мемлекеттік сатып алу жоспарларының күшін жою арқылы 36 млрд теңге бюджет қаражатының негізсіз жұмсалуына жол берілмеді», - деді Өміралиев.
Атап айтқанда, бұрын жөнделген жолдарға, оның ішінде мердігерлердің кепілдік міндеттемелері әлі аяқталмаған нысандарға қайта жөндеу жүргізу үшін жаңа тендерлер жариялау фактілері анықталған.
Жиын қорытындысы бойынша үкімет басшысы Олжас Бектенов жұмыс тобына қараша айының соңына дейін жол саласын реформалау жөніндегі ұсыныстардың толық пакетін әзірлеуді тапсырды.