13 қазаннан бастап Қазақстанда жедел медициналық көмек және медициналық авиация көрсету ережелеріне өзгерістер күшіне енеді. Олар бригаданың шығуы туралы автоматты хабарламаларды, оның қозғалысын онлайн бақылауды және медицина қызметкерлерін бейнежетондармен жабдықтауды көздейді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Алайда бұл функциялардың әр өңірде нақты іске қосылу мерзімдері бұйрықта көрсетілмеген.
Бригаданың қозғалысын онлайн бақылау
Бригада жіберілгеннен кейін пациентке оның шыққаны туралы автоматты түрде хабарлау және геосервистер арқылы көліктің орналасқан жері мен қозғалысын нақты уақыт режимінде бақылау мүмкіндігі берілуі тиіс.
Жедел жәрдемді 103 нөмірі бойынша, сондай-ақ мобильді қосымшалар, мессенджерлер және чат-боттар арқылы, оның ішінде геолокацияны жіберу арқылы шақыруға болады.
Шақыртуларды бөлу
Жедел жағдайларға байланысты шақыртулар алғашқы медициналық-санитарлық көмек ұйымдарының — емханалардың мобильді бригадаларына жіберіледі. Бұл пациенттің өмірі мен денсаулығына тікелей және ықтимал қауіп төндірмейтін жедел аурулар немесе созылмалы аурулардың асқынуы туралы.
Жұмыс күндері мобильді бригадалар 08:00-ден 20:00-ге дейін жұмыс істейді. Бұл ретте қайта бағыттау үшін шақыртуларды тіркеу жұмыс күндері 08:00-ден 19:00-ге дейін және сенбіде 08:00-ден 12:00-ге дейін қарастырылған.
Емханалардың жұмыс уақытынан тыс уақытта мұндай шақыртуларды жедел жәрдем станциясының бригадалары қабылдайды. Мобильді бригада пациентке өзінің қызмет көрсету аймағында, оның тіркелген жеріне қарамастан, нақты орналасқан жері бойынша көмек көрсетеді.
Келу мерзімдері
Ережелерде келесі келу мерзімдері қарастырылған:
- 01Уақыт бригада диспетчерден шақыртуды алған сәттен бастап есептеледі.
Диспетчердің кеңесі
Медиктер келгенге дейін диспетчер қауіпті жағдайлардың бірқатары кезінде қоңырау шалушыға телефон арқылы кеңес беруі тиіс. Тізімге жүрек тоқтауы, тыныс алудың бұзылуы, естен тану, қан кету, құрысулар, жедел коронарлық синдром мен инсульт белгілері, сондай-ақ үйдегі босану кіреді.
Қауіпсіздік шаралары
Жедел жәрдем және емхана қызметкерлерінің қауіпсіздігі үшін олар рациялармен, киімге тағылатын бейнежетондармен және мобильді камералармен жабдықталуы тиіс. Олар шақырту кезінде және пациентті тасымалдау барысында жағдайды аудио- және бейнежазбаға түсіруге арналған.
Егер медицина қызметкерлерінің өміріне немесе денсаулығына қауіп төнсе, шақыртуға одан әрі қызмет көрсету ішкі істер органдары қызметкерлерінің қатысуымен жүргізіледі.
Кәмелетке толмағандар туралы ерекше тәртіп
Жалғыз ата-ананы немесе заңды өкілді ауруханаға жатқызу кезіндегі іс-қимыл тәртібі бөлек айқындалған. Егер кәмелетке толмаған балалар қараусыз қалса, олар ата-анасының қамқорлығынсыз қалған балаларға арналған ұйымдарға орналастыру үшін ішкі істер органдарының қызметкерлеріне тапсырылады.
Не істелмейді
Ережелерде жедел жәрдем және алғашқы медициналық-санитарлық көмек бригадалары шақыртуларға рецепт жазып бермей және еңбекке жарамсыздық парағын бермей қызмет көрсететіні қарастырылған. Олар сондай-ақ алкогольдік немесе есірткілік масаңдыққа куәландыру, өлім фактісін куәландыру жүргізбейді және өлім туралы қорытынды бермейді.