Президент Қасым-Жомарт Тоқаев ірі қытайлық Sunwah Group корпорациясының төрағасы Цай Гуаньшэньмен кездесіп, екі ел арасындағы экономикалық ынтымақтастықтың жаңа бағыттарын, соның ішінде жасанды интеллект саласын дамытуды талқылады, деп хабарлайды Qazaqyia ақпарат агенттігі.
Мемлекет басшысы Қазақстанның Қытаймен жан-жақты стратегиялық серіктестікті нығайтуға ерекше мән беретінін жеткізді. Осы ретте ол 2013 жылы Астанада ҚХР Төрағасы Си Цзиньпин ұсынған «Бір белдеу, бір жол» бастамасының сәтті жүзеге асып жатқанын еске салды.
Тоқаев екі елдің сауда-экономикалық байланыстарының қарқынын жоғары бағалады. Қазіргі таңда Қытай Қазақстанның ең ірі сауда серіктесіне айналып, тауар айналымы жыл сайын рекордтық көрсеткіштерге жетіп отыр.
Кездесуде инвестициялық ынтымақтастыққа баса назар аударылды. Президент Қазақстанның шетелдік инвесторлар үшін қолайлы жағдай жасауға және стратегиялық маңызы бар бірлескен жобаларға толық қолдау көрсетуге дайын екенін мәлімдеді.
««Әлем жасанды интеллектінің белсенді даму кезеңіне қадам басты. Бұл бағытта Қытай көш бастап келеді. Біз Қытай тарапымен осы саладағы ынтымақтастықты дамытуға ниеттіміз», – деді Мемлекет басшысы.»
—
Цай Гуаньшэнь – Қытай Халықтық саяси консультативтік кеңесі Бүкілқытайлық комитетінің Тұрақты комитет мүшесі және Гонконгтағы Қытай бас сауда палатасының төрағасы.
Фото: Әлеуметтік желіден