Жапонияның оңтүстік-батыс Кюсю аймағында сейсенбі күні болған 6,8 балдық жер сілкінісінен кейін 100-ден астам дүмпу тіркелді. Зілзала салдарынан кемінде 13 адам қаза тапты. Бұл туралы Qazaqyia.kz порталы BBC News басылымына сілтеме жасап хабарлайды.
Көптеген адамдар «жүрек-өкпе тоқтауы» жағдайында деп хабарланды – бұл термин Жапонияда өлім ресми расталмай тұрып алдын ала есептерде жиі қолданылады.
Қатты ыстыққа қарамастан, құтқарушылар Кумамото префектурасындағы қағаз фабрикасы мен сауда орталығының қирандыларын қазып, аман қалғандарды іздеуде. Сауда орталығында жер сілкінісінен кейін бір сағаттан соң жарылыс болды.
Жапония премьер-министрі Санаэ Такаичи құтқару жұмыстарын «уақытпен жарыс» деп атады. Мыңдаған адамдар эвакуациялық орталықтарда, көпшілігі электр қуатынсыз қалды.
Жапония метеорологиялық агенттігі (JMA) тұрғындарды күшті дүмпулерге дайын болуға шақырды. JMA өкілі: «Келесі аптада, әсіресе алдағы екі-үш күнде, максималды сейсмикалық қарқындылығы 7 болатын жер сілкіністерінен сақ болуыңызды өтінеміз», – деді.
Құтқарушылар Кашима қаласындағы Aeon Mall сауда орталығының қирандыларын қарауды жалғастыруда, онда екінші қабаттың бір бөлігі құлаған. Сауда орталығының президенті Акио Йошида үш адамның қаза тапқанын, тағы үш адамның хабарсыз кеткенін растады. Сауда орталығында 2700 адам жұмыс істеген.
Йошида дүйсенбідегі баспасөз мәслихатында: «Біз бұл оқиға үшін шын жүректен кешірім сұраймыз», – деді.
Яцуширо қаласындағы зауытта екі адам өлі табылып, тоғыз адам хабарсыз кеткен. Такаичи: «Жер сілкінісінен 20 сағаттан астам уақыт өтсе де, көмекке мұқтаж адамдар бар», – деді.
Құтқару жұмыстарына 4600-ден астам адам жұмылдырылды. Температура 35°C-қа жеткендіктен, құтқарушылар мен зардап шеккендерге ыстықтан сақтану шараларын қабылдау ұсынылды.
Қорғаныс министрі Шинджиро Коидзуми X әлеуметтік желісінде 300-ге жуық кондиционер Кумамотоға жеткізілетінін хабарлады.
JMA жер сілкінісінің магнитудасын 7,1 деп өлшеді, ал АҚШ Геологиялық қызметі кейінірек 6,8 деп көрсетті. Жер сілкінісінің эпицентрі таяз (10 км тереңдікте) болып, Кумамото қаласынан оңтүстікке қарай 20 км жерде орналасқан.
NHK көрсеткен кадрларда жарылған жолдар мен көпірлер, бірнеше ғимараттың өртеніп жатқаны көрінді. Пойыздар қозғалысы тоқтатылып, мыңдаған үйлер жарықсыз қалды.
75 жастағы тұрғын Хироко Огата BBC-ге: «Кенеттен қатты діріл болды, мен қорықтым... Мен 75 жыл бойы осында тұрдым, бірақ мұндай үлкен жер сілкінісін ешқашан сезінбеппін. Өлемін деп ойладым», – деді.
Америкалық турист Шантель Мохар отбасымен Кумамотоға сапарлап жүргенде жер сілкінісі болған. Ол BBC-ге: «Автобуста жүргенде бәрінің телефоны дүмпу туралы ескертумен шырылдады. Қатты шайқалу мен абыржу болды», – деді.