Запорожье атом электр станциясы бір аптадан астам уақыт бойы сыртқы электр қуатынсыз жұмыс істеп тұр. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Халықаралық атом энергиясы агенттігінің (МАГАТЭ) бас директоры Рафаэль Гросси бұл жағдайды ресми түрде растады. Оның айтуынша, станция сыртқы электрмен жабдықтаусыз қалғанына бір аптадан астам уақыт өткен.
«Қазіргі уақытта станция ядролық қауіпсіздік пен қорғаудың негізгі функцияларын орындауға қажетті электр қуатын алу үшін апаттық дизель генераторларын пайдаланып отыр», – деп атап өтті Гросси.
Гроссидің бұл сөзі МАГАТЭ-ның Х әлеуметтік желісіндегі ресми аккаунтында жарияланған. Осыған байланысты ол Запорожье АЭС-ін жеткілікті мөлшерде дизель отынымен қамтамасыз етудің маңыздылығын ерекше атап өтті.
Бұл жағдай атом электр станциясының қауіпсіздігіне қатысты халықаралық деңгейде алаңдаушылық тудырып отыр. МАГАТЭ мамандары станциядағы ядролық қауіпсіздік жағдайын бақылауды жалғастыруда.