Украина жыл соңына дейін Еуропалық одақтан 10 миллиард еуродан астам қаржылай көмек алу үшін 25 реформаны жүзеге асыруға тиіс. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
"Украинская правда" басылымы ЕО-дағы дереккөздерге сілтеме жасап, Украина билігі ЕО-ның 90 миллиард еуро көлеміндегі кредиті мен Ukraine Facility бағдарламасы аясында Украина бюджетін қолдауға арналған 10 миллиард еуродан астам қаржыны алу үшін 25 реформалық қадамды орындауы қажет екенін хабарлады.
Атап айтқанда, Украина жеті реформаны, соның ішінде жоғары деңгейдегі прокурорларды ашық әрі әділ іріктеу туралы заңдарды және шағын және орта бизнес үшін төлем қабілетсіздігі рәсімдерін жеңілдету жөніндегі заңдарды қабылдаса, 2,86 миллиард еуро ала алады. Сондай-ақ 2026 жылы Украина 18 реформалық қадамды орындаған жағдайда 7,5 миллиард еуро көлеміндегі ірі траншты алуы мүмкін. Бұл реформаларға мемлекеттік кәсіпорындардың тәуелсіз байқау кеңестерін тағайындау, сот шешімдерін орындауға арналған жаңартылған IT жүйесін енгізу, сондай-ақ білім беру мен денсаулық сақтау салаларына ауқымды инвестициялар салу кіреді.
Бұған дейін келісілген Киевке арналған 90 миллиард еуро көлеміндегі кредит екі бөліктен тұрады: оның 30 миллиард еуросы Украина бюджетінің қажеттіліктерін қолдауға арналған макроқаржылық көмек ретінде бөлінген, ал тағы 60 миллиард еуро әскери шығындар мен қорғаныс өнеркәсібін дамытуға жеке қарастырылған. Маусым айында Еуропалық Одақ Кеңесі Украинаға бюджетке қолдау көрсету мақсатында 3,2 миллиард еуро көлеміндегі алғашқы транштың аударылғанын хабарлаған болатын. Еуропалық комиссияның төрағасы Урсула фон дер Ляйеннің айтуынша, жақын арада 6 миллиард еуролық пакет аясында Украинада ұшқышсыз ұшу аппараттарын (дрондар) өндіруге арналған төлемдерді аудару басталады.