Қазақстанның 77 мың медицина қызметкерінің жалақысын көтеру жоспарын Дүниежүзілік денсаулық сақтау ұйымы (ВОЗ) қолдады. Ұйымның бас директоры Тедрос Адханом Гебрейесус президент Қасым-Жомарт Тоқаевқа және оның бастамаларына қолдау сөздерін білдірді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Гебрейесус Facebook-тегі жазбасында алғашқы медициналық-санитарлық көмекке инвестиция салу емдеуді адамдар үшін қолжетімді етуге мүмкіндік беретінін атап өтті.
«Президент Тоқаевтың 77 мың денсаулық сақтау қызметкерінің жалақысын арттыруға және адамдардың денсаулығы мен әл-ауқатын ұлттық саясаттың орталығына қоюға берік ұмтылысын құптаймын», – деп жазды ВОЗ басшысы.
Оның айтуынша, алғашқы медициналық-санитарлық көмекке инвестиция салу және денсаулық сақтау қызметкерлерін қолдау арқылы Қазақстан саяси басшылықтың баршаға қолжетімді медициналық қызметтерді қалай жақсарта алатынын көрсетіп отыр.
Гебрейесус сондай-ақ 1978 жылы қабылданған Алматы декларациясын еске салды. Бұл құжат «Баршаға денсаулық» жаһандық көзқарасын қалыптастыруға көмектесті. 2028 жылы оның қабылданғанына 50 жыл толады.
Бұған дейін «Курсив» Қазақстанда учаскелік қызмет мамандарының жалақысы 2027 жылдың 1 қаңтарынан бастап көтерілетінін жазған. Үстеме ақы 40%-ға дейін жетеді және үздіксіз еңбек өтіліне байланысты болады.
Үкіметке тапсырманы Қасым-Жомарт Тоқаев Қазақстан халқына Жолдауында берген. Оның айтуынша, жалақыны көтеру 77 мыңнан астам маманды қамтиды.