Венгрияда 24 жастағы ер адам мас күйінде жеңіл ұшақ ұрлап, «Пакш» атом электр станциясына қарай ұшты. Бұл туралы Qazaqyia.kz порталы Euronews басылымына сілтеме жасап хабарлайды.
Оқиға 29 тамызда таңертең болды. Ер адам Калоча қаласының аэродромында тұрған ұшаққа рұқсатсыз отырып, Венгриядағы жалғыз атом электр станциясы орналасқан Пакш қаласына қарай ұшты.
Әскери радарлар әуе кемесін бірден анықтады. Осыдан кейін Венгрия қорғаныс министрінің хабарлауынша, кезекші Gripen жойғыш ұшақтарының жұбы әуеге көтерілді.
«Пакш» АЭС-інен үш шақырым радиустағы әуе кеңістігі азаматтық авиация үшін 6 мың метр биіктікке дейін жабық. Венгриялық БАҚ деректеріне сәйкес, ұрланған ұшақ станция ауданында қауіпті маневрлер жасаған.
Бірнеше минуттан кейін ол Герьен елді мекенінің маңындағы күнбағыс алқабына мәжбүрлі қону жасады. Ер адам зақымдалған ұшақты тастап, автомобиль жолына шықты.
Венгрия полициясының хабарлауынша, бір автокөлік жүргізушісі ер адамға көмектесу үшін тоқтаған. Ол көлікке отырып, кетуге тырысқан, алайда ішіндегі жолаушы оған кедергі жасаған.
Полицейлер күдіктіні бірнеше минут ішінде ұстады. Тексеру ер адамның мас күйінде болғанын растады. Құқық қорғау органдары оның басқа да заттарды тұтынғанын анықтап жатыр.
Ұсталғанға қатысты көлік құралын заңсыз иелену және басқа да болжамды қылмыстар бойынша іс қозғалды. Полиция оны қамауға алуды сұрамақ.
Оқиғадан кейін полиция авиациялық билікпен бірлесіп Калоча аэродромында тексеру бастады. Ұқсас тексерулер Венгрияның басқа әуежайларында да жүргізілмек.