Комик Нұрлан Сабыровқа қатысты әлеуметтік желіде тараған даулы ақпараттан кейін Ішкі істер министрлігі ресми мәлімдеме жасап, оған қатысты қылмыстық іс қозғалмағанын хабарлады, деп хабарлайды Qazaqyia ақпарат агенттігі.
Бұған дейін желіде Сабыровтың ресейлік «Вагнер» жеке әскери компаниясының содырларына мотоцикл сыйлап, қаржылай көмек көрсеткені туралы ақпарат тараған болатын. Бұл дерек қоғамда үлкен талқыға түсіп, көпшіліктің сынына ұшырады.
Осы оқиғаға байланысты Ұлттық қауіпсіздік комитеті (ҰҚК) тексеру жұмыстарын бастағанын мәлімдеген еді.
Алайда Ішкі істер министрлігі бұл ақпаратты жоққа шығарды. Ведомствоның ресми жауабына сәйкес, аталған дерек бойынша ешқандай қылмыстық іс тіркелмеген.
««Нұрлан Сабыровқа қатысты қылмыстық іс қозғалған жоқ», — делінген ІІМ хабарламасында.»
—
Қазіргі уақытта ҰҚК тарапынан жүргізілген тексерістің нәтижесі туралы қосымша ақпарат жарияланған жоқ.
Фото: Әлеуметтік желіден