Ұлыбритания, Франция және Германия Украина үшін алыс қашықтыққа соққы беретін қару-жарақ пен әуе қорғанысы жүйелерін бірлесіп өндіруді жоспарлап отыр. Бұл туралы Лондонда өткен келіссөздердің қорытындысы бойынша жасалған бірлескен мәлімдемеде айтылған. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Франция президенті Эммануэль Макрон, Германия канцлері Фридрих Мерц, Ұлыбритания премьер-министрі Кир Стармер және Владимир Зеленский кеше Даунинг-стритте келіссөз өткізді. "Мемлекет басшылары тосқауылшы зымыран өндірісін ұлғайту, сондай-ақ зымыранға қарсы қорғаныс жүйелері мен алыс қашықтыққа арналған қару-жарақты бірлесіп әзірлеу қажеттігін атап өтті", – делінген Даунинг-стрит таратқан мәлімдемеде.
Саясаткерлер Еуропаның қорғаныс қабілетін күшейту мақсатында Украинамен ұзақ мерзімді өнеркәсіптік ынтымақтастықты кеңейту мәселесін де талқылады. "Олар Еуропаның Украинаның тұрақты қолдаушысы ретінде кез келген реттеу үдерісінде маңызды рөл атқаруға тиіс екенін атап өтті", – делінген мәлімдемеде.
Сондай-ақ аталған елдер қақтығысты реттеу аясында Украина аумағына Батыс елдерінің әскери контингентін орналастыру идеясын қолдауды жалғастырып отыр.