Конор Макгрегордың октагонға оралуы миллиондаған жанкүйер күткендей болмады. Ирландиялық бес жылдағы алғашқы жекпе-жегінде Макс Холлоуэйге бірінші раундта-ақ жеңілді. Бұл туралы Qazaqyia.kz порталы Kursiv Media басылымына сілтеме жасап хабарлайды.
UFC 329 турнирінің басты жекпе-жегі бір раундтан да аз уақытқа созылды. Макгрегор жарақат алғаннан кейін төреші жекпе-жекті тоқтатып, Холлоуэйге техникалық нокаут арқылы жеңіс берді.
Ирландиялық үшін бұл 2021 жылдан бері октагонға алғашқы шығуы еді. Оның оралуы бірнеше ай бойы белсенді талқыланды, ал UFC 329 турнирі аралас жекпе-жек өнерінің жанкүйерлері үшін жылдағы ең күтілген оқиғалардың біріне айналды.
Кештің көмекші басты жекпе-жегі де кем түспеді. Британиялық Пэдди Пимблетт француз Бенуа Сен-Дениді бірінші раундтың 52-секундында тұншықтыру әдісімен жеңді.
Турнирдің тағы бір маңызды оқиғасы — еркін күрестен олимпиада чемпионы Гейбл Стивсонның дебюті. Американдық UFC-дегі мансабын сәтті бастап, Элиша Элиссонды бірінші раундта нокаутқа жіберді.
Сонымен қатар, UFC-дің бұрынғы чемпионы Роберт Уиттакер жартылай ауыр салмақта дебют жасап, Никита Крыловты үшінші раундта нокаутқа ұшыратты.
Бұған дейін «Курсив» қазақстандық батыр және Power Slap турнирлерінің қатысушысы Закир Найманбаев UFC-дің экс-чемпионы Конор Макгрегорды шапалақтар сайысына шақырғанын жазған болатын.