Ақорданың баспасөз қызметі президент Қасым-Жомарт Тоқаевтың "Жаңа тарихи кезеңдегі Қазақстанның өзекті міндеттері" атты Қазақстан халқына жолдауының толық мәтінін жариялады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Жолдаудың негізгі мазмұны
Өз сөзінде Мемлекет басшысы Жолдаудың мәні де, мазмұны да айрықша екенін атап өтті. 25 қазанда ұлттық мереке – Республика күні атап өтілгенін, осы күні Егемендік туралы декларация қабылданғанын еске салды. Биыл қасиетті Тәуелсіздікке 35 жыл толып жатқанын айтты.
Президент биыл наурыз айында халық мемлекеттігінің негізгі тірегі – Конституцияны қабылдағанын, оның 1 шілдеде заңды күшіне енгенін және еліміздің саяси жүйесінің түбегейлі жаңғыруына, жаңа билік институттарының құрылуына үлкен серпіліс бергенін атап өтті.
Әлемдегі ахуал және ішкі тұрақтылық
Жолдауда жаһандық сын-қатерлердің қауіпті сипат алғаны, әлем елдері арасында ақылға қонымсыз жалған айыптаулар мен астыртын текетірестер күшейгені, алпауыт мемлекеттер арасында өзара сенім дағдарысы пайда болғаны айтылды. Бақылаусыз көші-қон ағындарының көбейіп, бірнеше еуропалық елдің қауіпсіздігіне зиян келтіргеніне көз жеткізілді. Біріккен Ұлттар Ұйымының абырой-беделі тоқырауға ұшырап, халықаралық құқықтың құндылығы төмендегені баса айтылды.
Мұндай күрделі, болжамсыз ахуал "қырғи-қабақ соғыс" кезінде де болмағанына назар аударылды. Осындай құбылмалы заманға қарамастан, Қазақстан ел дамуының жаңа дәуіріне үлкен сеніммен қадам басып, кең ауқымды саяси реформаны іске асырғаны атап өтілді.
Стратегиялық міндеттер
Президент алдағы уақытта еліміздің егемендігін нығайту қажеттігін, бұл ішкі тұрақтылықты сақтай отырып өсіп-өркендеу деген сөз екенін айтты. Бүкіл қоғамның, соның ішінде отаншыл, белсенді, білімді азаматтардың қарқынды еңбек етуі керектігіне тоқталды. Мемлекеттік аппарат пен құқық қорғау мекемелерінің рөлі аса маңызды екенін атап өтті.
Қазіргі буын өкілдері жас ұрпақтарға жоспарлар мен тұжырымдар емес, экономикасы қуатты және қарқынды, жоғары технологиялары дамыған, білім мен ғылымға негізделген, заңды мойындайтын, жасампаз әрі озық, геосаяси тұрғыдан күші мен ықпалы бар Қазақстанды қалдыруы керектігі стратегиялық міндет ретінде айқындалды.
Инфрақұрылым және қалаларды дамыту
Жолдауда азаматтарды толыққанды әлеуметтік инфрақұрылыммен қамту – халықтың тұрмыс сапасын көтерудің маңызды шарты екені айтылды. Қазақстан ауқымды құрылыс алаңына айналуға тиіс екені, барлық аймақта жаппай құрылысты бастап, жандандыру қажеттігі атап өтілді. Облыстардың денсаулық сақтау, білім беру, мәдениет және спорт нысандарына деген қажеттілігін егжей-тегжей анықтау жұмысын тез арада бітіру керектігі тапсырылды.
Ауыл-аймақтарды дамыту мәселесі ерекше бақылауда ұсталатыны, ауыл тұрғындарының лайықты өмір сүруі үшін жағдай жасалып отырғаны айтылды. Сонымен қатар экономика, білім мен технологияның тірегі де, таланттарды шыңдайтын да негізгі қалалар екені атап өтілді. Қуатты қалалар қуатты аймақтардың, ал қуатты аймақтар күшті мемлекеттің негізін қалайтыны түсіндірілді.
Әрбір ірі қаланың Үкімет бекіткен нақты орта және ұзақ мерзімдегі даму жоспары болуға тиіс екені, Үкімет әкімдіктермен бірлесіп қала инфрақұрылымының цифрлық сыңарын көп ұзамай әзірлеуге тиіс екені тапсырылды. Қалалардың қауіпсіз, жайлы, көрікті болуы басымдық ретінде қарастырылып, бұл іс аса маңызды мемлекеттік міндет деп қабылдануы керектігі айтылды. Бұл "Таза Қазақстан" жалпыұлттық тұжырымдамасына толық сай келетін талап екені атап өтілді.
Экономикалық көрсеткіштер
Халықаралық валюта қоры ұсынған болжамға сәйкес, биыл еліміздің жалпы ішкі өнімі 400 миллиард долларға жуықтайтыны, оның жан басына шаққандағы үлесі 19 мың доллардан асатыны айтылды. Еліміз экономикасының көлемі жағынан әлемде 47 орынға көтерілетіні, бұл халқының саны бізден әлдеқайда көп бірқатар елдің көрсеткішінен жоғары деңгей екені атап өтілді. Өңдеу өнеркәсібінің де қарқынды дамып, оның жалпы ішкі өнімдегі үлесі 14 пайыздан асқаны хабарланды.