Қазақстан президенті Қасым-Жомарт Тоқаев Қырғызстан президенті Садыр Жапаровты және қырғыз халқын Тәуелсіздік күнімен құттықтады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қырғызстан басшысының баспасөз қызметі таратқан құттықтауда: "Бұл маңызды күн қырғыз халқының бостандыққа, егемендікке және тәуелсіздікке деген ұмтылысын білдіреді. Осы жылдар ішінде Қырғызстан өзінің қалыптасуынан бастап тұрақты дамуға дейінгі қиын жолдан өтті, мемлекеттілігін нығайтты, бай рухани мұрасын сақтап қалды және халықаралық аренада беделді мемлекетке айналды", - делінген.
Тоқаевтың айтуынша, Қырғыз Республикасының 2027-2028 жылдарға Біріккен Ұлттар Ұйымы Қауіпсіздік Кеңесінің тұрақты емес мүшесі болып сайлануы мұның айқын дәлелі. Сондай-ақ, ол экономикалық өсімді қамтамасыз етуге және Қырғызстан халқының әл-ауқатын жақсартуға бағытталған ауқымды реформалар жайында айтты.
"Қазақстан мен Қырғызстан ғасырлар бойы қалыптасқан достық пен тату көршілік дәстүрлеріне негізделген шынайы бауырластық қарым-қатынастарды ұстанады. Біздің елдеріміз өзара сенім мен ынтымақтастықтың берік негізіне сүйене отырып, стратегиялық серіктестік пен одақтастықты үнемі дамытып келеді", - деді Қасым-Жомарт Тоқаев.
Президент қазақ-қырғыз қарым-қатынасы халықтардың игілігі мен Орталық Азияның гүлденуі үшін қарқынды түрде нығая беретініне сенім білдірді. Соңында ол Садыр Жапаровқа сарқылмас күш-қуат пен қоғамдық өмірінде табыстарға жетуді, ал бауырлас Қырғызстан халқына гүлдену мен өркендеуді тіледі.