Президент Қасым-Жомарт Тоқаев Қазақстанның қорғаныс министрі Дәурен Қосановты қызметтен босатты. Бұл туралы Qazaqyia.kz порталы Kursiv Media басылымына сілтеме жасап хабарлайды.
«Мемлекет басшысының Жарлығымен Қосанов Дәурен Жұматайұлы Қазақстан Республикасының Қорғаныс министрі қызметінен босатылды», — делінген Ақорда хабарламасында.
Бұған дейін Қосанов Маңғыстау облысына барып, Каспий теңізіндегі оқу-жаттығулар кезінде қаза тапқан төрт мерзімді әскери қызметшінің отбасыларына көңіл айтқан болатын. Ол туыстарына көңіл айтып, жан-жақты қолдау көрсетуге уәде берген.
Апат 24 қыркүйекте Каспийдегі Әскери-теңіз күштерінің оқу-жауынгерлік тапсырмалары кезінде болды. Дауыл мен желдің күрт екпінінен 17 әскери қызметші ашық теңізге ағызылып кетті: 14 адам қаза тапты, үшеуін құтқару мүмкін болды. Президент Қасым-Жомарт Тоқаев 25 қыркүйекті жалпыұлттық аза тұту күні деп жариялады.
Апаттың себептері мен мән-жайын вице-премьер Қанат Бозымбаевтың басшылығымен арнайы үкіметтік комиссия анықтап жатыр. Сарбаздардың қаза табуы фактісі бойынша немқұрайлылық пен кеме жүргізу ережелерін бұзу туралы қылмыстық іс тергеліп жатыр, оның барысы Бас прокуратураның жеке бақылауында. Тергеу аясында 30-дан астам адам жауапқа тартылып, күдікті лауазымды тұлғалардың шеңбері анықталды.
Кейінірек Каспий теңізінен тағы екі әскери қызметшінің денесі табылды.
Бұған дейін «Курсив» Қорғаныс министрлігінің бес лауазымды тұлғасы әскери қызметшілердің қаза табуы туралы іс бойынша ұсталғанын жазған болатын. Күдіктілердің қатарында Қазақстанның әскери-теңіз күштері бас қолбасшысының бірінші орынбасары және жеке құрамды түсіру жүргізілген «Қайсар» катерінің командирі бар.
Кеше мемлекет басшысы Қорғаныс министрлігінің істерінің жай-күйін кешенді тексеру үшін комиссия құрды. Ол әскери бөлімшелердің қаржылық және материалдық-техникалық қамтамасыз етілуін де зерделейді.