Қасым-Жомарт Тоқаев «Орталық Азия – Корея Республикасы» саммитінің алғашқы отырысында сөз сөйлеп, Алматыда маңызды материалдар саласына бағытталған бірлескен кәсіпорын құруды ұсынды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қазақстанның ресурстық әлеуеті
Мемлекет басшысы Қазақстанның айтарлықтай ресурстық базаға ие екенін және сирек жер металдарының қоры жөнінен әлемдегі көшбасшылар қатарына кіретінін атап өтті.
«Қазақстан айтарлықтай ресурстық базаға ие және сирек жер металдарының қоры жөнінен әлемдегі көшбасшылар қатарына кіреді. Айта кетерлігі, Корея стратегиялық деп жіктеген он минералдың барлығы да еліміздің минералдық-шикізат базасында кездеседі», – деп атап өтті президент.
Технологияларды дамыту институтымен ынтымақтастық
Тоқаев Қазақстанның ресурстық әлеуеті мен Кореяның технологиялық мүмкіндіктерін ұштастыру өзара тиімді ынтымақтастық үшін кең перспективалар ашатынына сенімді.
Мемлекет басшысы сапар барысында Кореяның Технологияларды дамыту институтының қатысуымен Алматы қаласында сирек және сирек жер металдарын зерттеу жөніндегі бірлескен орталық құру туралы қол жеткізілген уағдаластықты құптады.
Толық өндірістік цикл қалыптастыру
Президент бірлескен кәсіпорын құру жөніндегі ұсынысын жариялап, мақсатты нақтылады.
«Біздің мақсатымыз – маңызды шикізатты барлау мен өндіруден бастап, оны терең өңдеуге және қосылған құны жоғары өнімдерді шығаруға дейінгі толық өндірістік циклді қалыптастыру болуы тиіс. Бұл жартылай өткізгіштер, микроэлектроника, аккумуляторлар, электромобильдерге арналған құрамдас бөліктер мен робототехника өндірісін қамтиды... Біз қазақ-корей бірлескен кәсіпорнын құруды ұсынамыз», – деп атап өтті ол.