Қазақстан президенті Қасым-Жомарт Тоқаев Айнур Даненованы Мароккоға, ал Олжас Исабековты Кубаға Қазақстанның елшісі етіп тағайындады. Тиісті жарлықтар 31 қазанда жарияланды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Сонымен қатар мемлекет басшысы Андриан Елемесовты Қазақстанның Кубадағы елшісі қызметінен босатты. Кадрлық шешімнің себептері хабарламада көрсетілмеген.
Айнур Даненова туралы
Айнур Даненова 1980 жылы 7 желтоқсанда Қостанайда дүниеге келген. Париждегі Сорбоннада және әл-Фараби атындағы Қазақ ұлттық университетінде халықаралық құқыққа қатысты мамандық бойынша білім алған. Француз, ағылшын және испан тілдерін меңгерген.
Даненова кәсіби мансабын халықаралық ұйымдарда бастаған. 2003 жылдан 2011 жылға дейін Халықаралық көші-қон ұйымының, БҰҰ-ның Бүкіләлемдік туристік ұйымының, БҰҰ-ның Даму бағдарламасының және БҰҰ-ның Босқындар істері жөніндегі жоғарғы комиссары басқармасының құрылымдарында жұмыс істеген.
2014–2019 жылдары Женевадағы БҰҰ бөлімшесі және басқа да халықаралық ұйымдар жанындағы Қазақстанның Тұрақты өкілдігінде дипломатиялық лауазымдар атқарған. Кейіннен Сыртқы істер министрінің кеңесшісі болып, СІМ-де гуманитарлық ынтымақтастық және адам құқықтары басқармасын басқарған.
2020–2025 жылдары Даненова Қазақстанның Франциядағы елшілігінде кеңесші-уәкіл қызметін атқарған. Мароккоға тағайындалғанға дейін Сыртқы істер министрінің кеңесшісі болып жұмыс істеген.
Олжас Исабеков туралы
Олжас Исабеков 1979 жылы 26 маусымда дүниеге келген. 2000 жылы Шәкәрім атындағы Семей мемлекеттік университетін, ал 2004 жылы Ресей СІМ-нің Дипломатиялық академиясын бітірген. Ағылшын және испан тілдерін меңгерген.
Исабеков 2000 жылдан бері дипломатиялық салада жұмыс істейді. Мансабын Қазақстанның Сыртқы істер министрлігінде бастап, кейін елдің Испания мен АҚШ-тағы елшіліктерінде қызмет атқарған.
2012–2013 жылдары ConocoPhillips North Caspian Ltd. компаниясында сыртқы және үкіметтік байланыстар жөніндегі директор қызметін атқарған. Одан кейін мемлекеттік қызметке оралып, 2019 жылға дейін Қазақстан СІМ-нің сыртқы экономикалық саясат департаментін басқарған.
2019 жылы Исабеков ерекше тапсырмалар жөніндегі елші болып жұмыс істеген, кейін 2021 жылға дейін Премьер-министр Кеңсесінің сыртқы экономикалық ынтымақтастық және протокол бөлімін басқарған.
Жаңа елшінің Кубада дипломатиялық жұмыс тәжірибесі бар. 2021–2022 жылдары ол Гаванадағы Қазақстан елшілігінде кеңесші-уәкіл қызметін атқарған, ал 2022–2023 жылдары Мексикада жұмыс істеп, Қазақстанның уақытша сенімді өкілі міндетін атқарған.
2024–2025 жылдары Исабеков Kazenergy қауымдастығының сыртқы байланыстар және коммуникациялар департаменті директорының орынбасары болған. Жаңа тағайындауға дейін Қазақстанның Сыртқы істер министрінің кеңесшісі қызметін атқарған.