Қазақстанда инфрақұрылымдық жаңғыру жоспары әзірленіп, оны іске асыру үшін 2029 жылдың соңына дейін Ұлттық қордан шамамен 6,5 триллион теңге бөлінеді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Бұл жөнінде президент Қасым-Жомарт Тоқаев Қазақстан халқына арнаған жолдауында айтты.
Экономикалық көрсеткіштер
Халықаралық валюта қоры ұсынған болжамға сәйкес, биыл еліміздің жалпы ішкі өнімі 400 миллиард долларға жуықтайды. Оның жан басына шаққандағы үлесі 19 мың доллардан асатын болды.
«Еліміз экономикасының көлемі жағынан әлемде 47 орынға көтеріледі. Бұл – халқының саны бізден әлдеқайда көп бірқатар елдің көрсеткішінен жоғары деңгей деген сөз», – деді президент.
Мемлекет басшысы алтын-валюта резерві мен Ұлттық қор активтерінің көлемі 130 миллиард доллардан асқанын айтты. Оның айтуынша, енді осы қуатты әлеуетімізді инфрақұрылымды жаңғыртуға, еліміздің әр аймағын көркейтуге бағыттауымыз қажет.
Инфрақұрылымдық жаңғыру жоспары
«Сондықтан мен бұған дейін айтқан ауқымды құрылыс бастамасын белсенді түрде жүзеге асыруды тапсырамын. Соған сәйкес бүкіл ел бойынша аса қажетті әлеуметтік, көлік және инженерлік инфрақұрылым нысандары салынады. Үкімет бұрын-соңды болмаған Инфрақұрылымдық жаңғыру жоспарын әзірлейді. Бұл ауқымды жұмысты іске асыру үшін 2029 жылдың соңына дейін Ұлттық қордан шамамен 6,5 триллион теңге бөлінеді», – деді Тоқаев.
Сонымен қатар президент биыл және 2027 жылдың алғашқы екі айы ішінде әлеуметтік жобаларды іске қосу үшін 1,5 триллион теңге көлемінде қаражат қарастыру қажет екенін атап өтті.
Осылайша, Қазақстан экономикалық өсімнің жаңа кезеңіне – инфрақұрылымдық жаңғыруға бет алмақ. Бұл бастама елдің әлеуметтік, көліктік және инженерлік инфрақұрылымын жаңартуға бағытталған.