Халықаралық шахмат федерациясының (FIDE) президенті Тимур Турлов 27 қыркүйекте Самарқандта өткен 46-шы Дүниежүзілік шахмат олимпиадасының жабылуында жаңа қызметінде алғаш рет сөйледі. Бұл туралы Qazaqyia.kz порталы Kursiv Media басылымына сілтеме жасап хабарлайды.
Өз сөзінде ол ұйымның ортақ мақсаттарының бірі ретінде шахматты Олимпиада ойындарының бағдарламасына енгізуді атады.
Олимпиада қатысушылары мен ұйымдастырушыларының алдында сөйлеген Freedom Holding Corp. CEO-ы ұлттық федерациялардың оны FIDE президенті етіп сайлауын үлкен сенім және үлкен жауапкершілік деп атады.
«Мен үшін FIDE президенті ретінде 46-шы Дүниежүзілік шахмат олимпиадасын жабу үлкен құрмет. Шахматқа және осы тарихи оқиғаға көрсеткен зор қолдауы үшін президент Шавкат Мирзиёевке, премьер-министр Абдулла Ариповқа, Өзбекстан үкіметіне, Өзбекстан шахмат федерациясына, ұйымдастыру комитетіне және FIDE командасына алғыс айтқым келеді. Осы Олимпиаданың өтуіне атсалысқан барлық адамдарға рахмет», — деді Тимур Турлов.
Оның айтуынша, FIDE-нің алда әлі көп жұмысы бар. Міндеттердің қатарында ол шахматты жаңа деңгейге шығаруды, ұйымның ашықтығын нығайту мен арттыруды, сондай-ақ ұлттық федерациялар үшін жаңа мүмкіндіктер жасауды атады.
«Біз ортақ мақсатымызға — шахматтың Олимпиада ойындарында болуына қарай жылжимыз. Осы қолдау үшін шын жүректен ризамын және өзіме жүктелген жауапкершілікті толық сезінемін», — деді FIDE-нің сайланған президенті.
Тимур Турлов сондай-ақ Олимпиаданың Орталық Азияда алғаш рет өтуі аймақта шахматтың танымалдығы артып келе жатқан кезде символдық мәнге ие екенін атап өтті. Оның айтуынша, турнир нәтижелері «шахмат бумасын» растайды және спорттық оқиға Өзбекстан мен Орталық Азияда шахматтың дамуына жаңа серпін береді.
Соңында FIDE басшысы жарыс ұйымдастырушылары мен қатысушыларына алғыс айтып, 46-шы Дүниежүзілік шахмат олимпиадасын ресми түрде жабық деп жариялады.
Еске салайық, 2026 жылғы 26 тамызда Қазақстан шахмат федерациясының президенті Тимур Турлов FIDE президенті болып екінші турда сайланған болатын. Сайлау ұйымның Бас ассамблеясы аясында өтті.
Бұған дейін Freedom Holding Corp. CEO-ы FIDE-ге сайланғаннан кейін қазақстандық шахматты қолдағаны үшін президент Қасым-Жомарт Тоқаевқа алғыс айтқан еді.