Tesla 2027 жылдың ортасында Техас штатындағы зауытында Cybertruck электр пикапын шығаруды тоқтатуды жоспарлап отыр. Компания босаған қуатты Cybercab роботаксиін өндіруді ұлғайтуға пайдаланады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Бұл ақпаратты Reuters агенттігі Илон Масктың мәлімдемесіне сілтеме жасап таратты. Маск пикапты «Tesla жасаған ең үздік автомобиль» деп атады, ал өндірісті тоқтатуды «дәуірдің соңы» деп бағалады.
Сатылым көрсеткіштері
Tesla Cybertruck-ты тұтынушыларға 2023 жылдың соңында жеткізе бастады. Сол кезде Маск жылдық сатылым 250 мың автомобильге жетуі мүмкін деп есептеген.
Алайда Kelley Blue Book деректеріне сәйкес, 2025 жылы АҚШ-та 20 237 пикап сатылған. Бұл 2024 жылмен салыстырғанда 48%-ға аз — сол жылы көрсеткіш 38 965 машина болған.
Сарапшы пікірі
Aston Martin компаниясының бұрынғы бас директоры Энди Палмер былай деді: «Егер компания қойған мақсаттарына жетпесе, жұмысты жалғастырудың мәні жоқ. Кез келген саналы автомобиль сарапшысы дәл осылай айтады».
Модель тарихы
Пикап 2019 жылы таныстырылды. Оның тот баспайтын болаттан жасалған бұрышты шанағы бірден дау тудырды, ал таныстырылым әйнектердің беріктігін сәтсіз тексерумен есте қалды: металл шармен соққыдан кейін екі терезеде жарықтар пайда болды.
2023 жылы жеткізу басталғанда Маск Cybertruck-ты Ford және General Motors пикаптарына футуристік балама ретінде ұсынды.