Теннесси штатының солтүстік-шығысындағы Хэмптон қаласында көлік велосипедшілер тобына соғылып, университет велокомандасының екі мүшесі қаза тауып, тағы жетеуі жарақат алды. Бұл туралы Qazaqyia.kz порталы Associated Press басылымына сілтеме жасап хабарлайды.
Миллиган университетінің мәліметінше, 11 велошабандоз таңғы жаттығу сапарында болған. Оқиға кампустан шамамен 11 миль (18 шақырым) қашықтықта, Аппалачи тауларының етегінде болған.
Округ прокуроры Стив Финнидің айтуынша, Солтүстік Каролинадан келген 69 жастағы ер адам қамауға алынып, оған абайсызда көлікпен адам өлтіру (екі эпизод) және көлікпен ауыр дене жарақатын келтіру (бес эпизод) айыптары тағылған.
Университет президенті Стивен Уэрс қаза тапқандар – Иллинойс штатының Уинтроп-Харбор қаласынан келген екінші курс студенті Хейлан Энгдал және Алабама штатының Хантсвилл қаласынан келген Брейден Роджерс екенін растады. Қалған студент-спортшылар жақын маңдағы Джонсон-Сити медициналық орталығына жеткізілді.
Уэрс эмоционалды бейнеүндеуінде: «Біз бауырларымызға жүктерін көтеруге көмектесуіміз керек, өйткені олардың жүгі бір адамның көтере алатынынан ауыр», – деді. Ол студенттерді жарақат алған курстастары үшін бірге дұға етуге шақырды.
Аурухананың травматология бөлімінің меңгерушісі доктор Брэкен Бернстің айтуынша, сәрсенбі күні кешке төрт студенттің жағдайы ауыр, екеуі тұрақты, бірақ ауруханада қалған, бір студент үйіне шығарылған.
Осы жылдың басында Миллиган университетінің ерлер велокомандасы Висконсинде өткен USA Cycling Collegiate Road Nationals жарысында командалық уақытқа жарыста ұлттық чемпион атанған болатын.
Теннесси жол патрулі оқиғаның мән-жайын тергеп жатыр. Апат болған 19-тасжолдың бөлігінде рұқсат етілген жылдамдық – сағатына 50 миль (шамамен 80 шақырым).