Қарағанды облысының Теміртау қаласында өрт сөндірушілер отқа оранған қосалқы құрылыстан 50 литрлік газ баллонын алып шығып, көршілес екі тұрғын үйді қорғап қалды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Төтенше жағдайлар министрлігінің мәліметінше, Электриков көшесіндегі өрт толығымен сөндірілді, зардап шеккендер жоқ.
Жеке тұрғын үйге жалғасқан қосалқы құрылыстың ағаш конструкциялары тұтанған. ТЖМ бөлімшелері оқиға орнына келгенде, ғимарат ашық жалынмен өртеніп жатқан. Өрт ауданы 120 шаршы метрді құрады.
«Өртті сөндіру барысында құтқарушылар жанған ғимараттан көлемі 50 литр болатын тұрмыстық газ баллонын алып шығып, ықтимал жарылысты болдырмады», — деп хабарлады ТЖМ.
Сондай-ақ өрт сөндірушілер оттың жақын маңдағы екі жеке тұрғын үйге таралуына жол бермеді.
Бұған дейін «Курсив» Түркістан облысында газ баллондары бар құрылыстың өртенгені туралы жазған. Ал қарсаңында өрт сөндірушілер Алматы облысындағы шашлықханада жарылысты болдырмаған болатын.