«Таза Қазақстан» бастамасын іске асыру барысында елімізде 3,8 млн тоннадан астам қалдық жиналып, 10 мыңға жуық қоқыс орны жойылды. Бұл деректерді экология және табиғи ресурстар министрі Алыбек Қуантыров президент Қасым-Жомарт Тоқаевқа ұсынды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Министрдің айтуынша, бастама аясында бүкіл ел бойынша 2 мыңнан астам экологиялық іс-шара өткізілді.
Астана әкімі Жеңіс Қасымбек президентке астананы абаттандыру және көгалдандыру туралы баяндады. Соңғы жылдары қалада 500-ге жуық аула мен қоғамдық кеңістік ретке келтірілді. 2026 жылдың соңына дейін тағы 170-тен астам аула мен қоғамдық аймақты, оның ішінде саябақтар, скверлер мен бульварларды абаттандыру жоспарланып отыр.
Есіл өзенінің бойында да үздіксіз жасыл маршрут құру жоспарлануда. Ол қаланың түрлі бөліктеріндегі саябақтарды, серуендеу және спорт алаңдарын біріктіруі тиіс.
Бұған дейін «Курсив» Тоқаевтың «Таза Қазақстан» акциясы аясында жастармен және экоактивистермен бірге Президент саябағында ағаш отырғызғанын жазған болатын. 19 қыркүйекте барлық өңірлерде Дүниежүзілік тазалық күніне орайластырылған қоғамдық кеңістіктерді тазалау шаралары да жоспарланған.