Президент Қасым-Жомарт Тоқаев Бахрейн королі шейх Хамад бен Иса Әл Халифамен телефон арқылы сөйлесіп, Таяу Шығыстағы шиеленісті жағдайды талқылады, деп хабарлайды Qazaqyia.KZ ақпарат агенттігі.
Мемлекет басшысы қазіргі қиын-қыстау кезеңде Қазақстанның Бахрейн халқына тілектес екенін білдірді. Сондай-ақ Иранға қарсы соғысқа қатыспаса да, зымыран шабуылына ұшыраған Бахрейн мен басқа да елдердің бейбіт инфрақұрылымына қатысты алаңдайтынын айтты.
«Қасым-Жомарт Тоқаев Қазақстанның жағдайды одан әрі ушықтыруға қарсы екенін және кез келген қақтығысты тек диалог пен дипломатия арқылы бейбіт жолмен шешуді қолдайтынын нақтылады.»
—
Өз кезегінде король Хамад бен Иса Әл Халифа Қазақстан президентіне ұдайы қолдау көрсеткені үшін алғысын айтты. Ол екіжақты ынтымақтастықты, әсіресе сауда-экономикалық және инвестициялық бағыттарды жандандыруға мүдделі екенін растады.
Тараптар достық қарым-қатынасты одан әрі нығайтуға келісіп, қасиетті Рамазан айында екі ел халқына амандық пен береке тіледі.