Ташкентте 17 қазақстандық, оның ішінде 11 бала ауруханаға жатқызылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
КТК ақпаратына сәйкес, зардап шеккендердің төртеуі реанимацияда жатыр. Олар балалар футбол турниріне келіп, таңғы астан кейін өздерін нашар сезінген. Қазақстанның Сыртқы істер министрлігі жағдайды бақылауға алды.
Футболшылардың бірінің анасы Ольга Лазина ата-аналар әлі де талдау нәтижелерін күтіп жатқанын және балаларды үйге қайтару мәселесінің шешілмегенін айтты.
«Ең қорқыныштысы — бізде әлі күнге дейін талдау жоқ. ПТР-тесттер кеше кешке алынды, бізге бар болғаны 12 сағатта дайын болады деп уәде етті. Таңертең Астанаға ұшақ беріледі, балаларымыз бес сағат қана жолда болады деп уәде етті. Қазір билет жоқ екені белгілі болып отыр. Бүгінге де, ертеңге де жоқ. Балаларымызды пойызбен жіберіп жатыр. Бұл бір тәулік тасымалдау. Қазір балаларда симптомдар пайда болып жатыр», — деді ол.
Сегіз-тоғыз жасар спортшылар Ташкентке жарысқа келіп, жаппай ауырып қалды. Ата-аналардың айтуынша, әлсіздік сенбі күні қонақүйдегі таңғы астан кейін басталған, балалар қуырылған жұмыртқа жеген.
Ауруханада үш команданың 11 баласы және алты ересек адам жатыр. Олардың барлығында қызба, лоқсу, құсу және қатты диарея бар. Осыған байланысты жарыстар тоқтатылды.
Ата-аналар балаларына жету үшін билет іздеп жүр және науқастар санының артуы мүмкін екенін жоққа шығармайды. Қазақстанның Сыртқы істер министрлігі жағдайды бақылап отырғанын мәлімдеді.
«Көмекке мұқтаж Қазақстанның барлық азаматтары Өзбекстан Республикасының мамандандырылған медициналық мекемелеріне жатқызылып, оларға қажетті дәрігерлік көмек көрсетілуде. Қазақстандық дипломаттар зардап шеккендердің туыстарымен және медициналық мекемелермен байланыста болып, бұл мәселені тұрақты бақылауда ұстап отыр», — деп хабарлады ведомство.