Жамбыл облысында сатып алушы ұрланған автокөлік үшін төлеген 6,5 млн теңгені сот арқылы қайтарып алды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Іс материалдарына сәйкес, 2024 жылдың маусым айында ер адам 2022 жылғы Hyundai Elantra автокөлігін 6,5 млн теңгеге сатып алған. Алайда бірнеше айдан кейін полиция көлікті тәркіледі – автокөлік Алматыда тергеліп жатқан қылмыстық іс бойынша заттай дәлел болып шықты.
Тергеу барысында шетелдік автокөліктің бұрын заңды иесінен ұрланғаны, содан кейін қайта сатылғаны анықталды. Сонымен қатар, автокөліктің VIN-нөмірі оның нақты сипаттамаларына сәйкес келмеді.
Сот сондай-ақ Самарадағы хабарландыру сайттары арқылы дәл осындай VIN-нөмірі бар ұқсас көлік сатылғанын анықтады. Бұл сату кезінде ұсынылған құжаттардың жалған екенін растады.
«Сот сатып алушының техникалық паспортта көрсетілген деректерге сәйкес келмейтін автокөлік сатып алғаны туралы қорытындыға келді. Сот шешімімен талап толық қанағаттандырылды: сатып алу-сату шарты бұзылды. Сатушы сатып алушыға 6,5 млн теңгені қайтаруға, сондай-ақ мемлекеттік баж және өкіл қызметтеріне жұмсалған шығындарды өтеуге міндеттелді», – деп хабарлады соттың баспасөз қызметі.
Бұған дейін «Курсив» тағы бір қазақстандықтың Украинада ұрланған автокөлік үшін ақшасын сот арқылы қайтарғаны туралы жазған болатын. Автокөліктің қылмыстық өткені сатып алғаннан кейін төрт жыл өткен соң, жаңа иесі көлікті сатпақ болған кезде анықталды.