Жетісу облысында тегін бағдарламалау және жасанды интеллект мектебі Tomorrow School-дың алғашқы аймақтық кампусы ашылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Кампус Талдықорғанда «Жетісу жастары» орталығының базасында облыстық цифрлық технологиялар басқармасы мен Jetisu Digital IT-хабының қолдауымен жұмыс істей бастады.
Оқыту үшін қажетті бағдарламалық қамтамасыз етілген 50 компьютер дайындалды. Мектеп тәулік бойы төрт ағынмен жұмыс істейді, сабақтар 28 қыркүйекте басталады.
Облыстық цифрлық технологиялар басқармасының басшысы Айдын Темірбаевтың айтуынша, оқуға 15 жастан асқан қатысушылар қабылданады. Арнайы білім немесе IT тәжірибесі талап етілмейді.
«Бұл 15 жастан асқан қатысушылар үшін бағдарламалау мен жасанды интеллект бойынша тегін практикалық оқудан өтуге үлкен мүмкіндік. Мектеп 24/7 төрт ағынмен жұмыс істейді. Сабақтар 28 қыркүйекте басталады», — деді Темірбаев.
Tomorrow School-ға түсу үшін жобаның сайтында тіркеліп, кампусты таңдап, өтінім толтырып, есте сақтау және логикаға арналған екі онлайн-ойыннан өту қажет. Сәтті үміткерлер төрт апталық интенсивке шақырылады.
Интенсивті курстан кейін үздік қатысушылар 18 айға созылатын негізгі бағдарламаға өте алады. Оқу толық күндік форматта, дәстүрлі лекциялар мен оқытушыларсыз өтеді: студенттер материалдарды өз бетінше оқиды, командаларда жұмыс істейді, бір-бірінің тапсырмаларын тексереді және бағдарламалау мен жасанды интеллект бойынша 50-ден астам практикалық жобаны орындайды.
Tomorrow School басшысы Әйгерім Шаймерденова түсу үшін бағдарламалауда алдын ала тәжірибенің қажет еместігін атап өтті.
Tomorrow School мектебі 2024 жылы Astana Hub базасында құрылған, қазір жоба Қазақстанның өңірлеріне таралуда.