Жаңа зерттеуге сәйкес, SUV көліктерінің велосипедшілер мен жаяу жүргіншілерге қауіптілігі туралы ескертілген жүргізушілердің бұл көліктерді сатып алудан бас тарту ықтималдығы өте төмен. Бұл туралы Qazaqyia.kz порталы The Guardian басылымына сілтеме жасап хабарлайды.
Зерттеуді жүргізген Суонси университетінің психологтарының пікірінше, бұл нәтижелер үкіметтер жолдардағы үлкен және қауіпті көліктердің санын азайтқысы келсе, қаржылық шаралар қолдануға мәжбүр болатынын көрсетеді.
Бірқатар зерттеулер SUV және оған ұқсас үлкен көліктердің (мысалы, пикаптар) жаяу жүргіншілер мен велосипедшілер үшін стандартты көліктерге қарағанда қауіпті екенін дәлелдеген. Қауіптің көп бөлігі олардың биік және доғал алдыңғы бөлігіне байланысты.
Осы жылдың басында жарияланған қауіпсіздік зерттеулерінің мета-талдауы көрсеткендей, егер ересек жаяу жүргіншіні SUV көлігі қағып кетсе, оның қаза болу ықтималдығы кішігірім көлікке қарағанда 44% жоғары. Балалар үшін бұл көрсеткіш 82% құрайды.
Зерттеу барысында Ұлыбритания бойынша 2000-нан астам адам (жүргізушілер мен жүргізуші еместер) екі топқа бөлінді. Жартысына SUV көліктерінің жарнамасы көрсетіліп, онда көліктің жаяу жүргіншілер мен велосипедшілер үшін "өлім қаупі айтарлықтай жоғары" екендігі туралы ескерту болды. Қалған топқа ескертусіз жарнама көрсетілді.
Ескертуді көрген топта SUV қауіптілігі туралы хабардарлық 35%-дан 54%-ға дейін өсті. Алайда, сол адамдардан келесі көлік ретінде SUV сатып алу ниеті туралы сұралғанда, бұл көрсеткіш тек 3,7 пайыздық тармаққа төмендеді. Яғни, ескертуге қарамастан, SUV сатып алуды жоспарлағандардың 95% бұл шешімінен қайтпады.
Тіпті жол қозғалысына қатысушылардың қауіпсіздігін маңызды деп санайтындар арасында да 86% SUV сатып алу жоспарын өзгертпеген.
Зерттеу авторларының бірі, Суонси университетінің эколог-психологы профессор Иан Уокер "мотопормативтілік" деп аталатын құбылысты зерттеген. Ол: "Бізге ұнайтын көлікті сатып алу және оны басқаларға әсері туралы ойланбастан жүргізу қоғамда қалыпты жағдайға айналған. Сондықтан адамдарды басқаша жүргізуге шақыру немесе ынталандыру жұмыс істемейтіні туралы дәлелдердің көбеюі таңқаларлық емес", - деді.
Қазіргі уақытта Еуропада жаңа көлік сатылымының 60%-ға жуығы SUV үлесіне тиесілі. Кейбір қалалар бұл мәселеге жауап ретінде шаралар қабылдауда. Мысалы, Париж 2024 жылы тұрғындардың дауыс беруінен кейін SUV көліктеріне тұрақ ақысын үш есеге арттырды. Лондондағы Transport for London компаниясы SUV көліктеріне қосымша алым енгізу мүмкіндігін қарастыруда.