Андрей Стенин атындағы фотожурналистика байқауының жеңімпаздары қазан айында жарияланады. Жеңімпаздарды жариялау салтанатты рәсімі және олардың жұмыстарының фотокөрмесінің ашылуы Мәскеу музейінде өтеді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Байқаудың кураторы Оксана Олейниктің айтуынша, 2026 жылғы ауқымды көрме Мәскеу музейінде өтеді. «Оқырмандарға осы көрмені ұсынғанымызға қуаныштымыз. Көрмеге биылғы барлық жеңімпаз бен жүлдегерлердің жұмыстары, соның ішінде 33 жастан асқан қатысушылар үшін алғаш рет тағайындалған "Өмір энергиясы" атты жаңа номинацияның туындылары қойылады», – деп атап өтті Олейник.
Оның айтуынша, жоғары деңгейдегі журналистердің жұмыстары кәсіби бағдарға айналып, жас фотографтардың шеберлік деңгейін айқындауға ықпал етуі мүмкін. «Ал көрме көрермендер мен қонақтарға әртүрлі құрлықтар мен елдерде өмір сүрсе де, барша адамзатқа ортақ тақырыптарды қозғайтын фотожурналистердің көзімен қоршаған әлемге көз жүгіртуге мүмкіндік береді», – деп толықтырды Олейник.
Көрме 2026 жылдың 21 қазаны мен 10 қарашасы аралығында Мәскеу музейінің кеңістігінде өтеді. 2026 жылы байқаудың қысқа тізіміне 13 елден келген жас фоторепортерлердің жеке фотосуреттері мен фотосериялары енді.
Биыл байқаудың беделді халықаралық қазылар алқасы Ресей, Аргентина, Иран, Бангладеш, Индонезия, Үндістан, Испания, Түркия және басқа да елдерден ұсынылған шамамен 2 500 жұмысты бағалады. Байқауға барлығы 36 елдің фотографтары қатысты.