Солтүстік Қазақстан облысында ағынды суларды заңсыз ағызып жібергені үшін коммуналдық кәсіпорынға 174 млн теңге айыппұл салынды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Бас прокуратураның мәліметінше, табиғат қорғау прокуратурасы жүргізген талдау шеңберінде Петропавл қаласында коммуналдық кәсіпорынның ағынды суларды заңсыз ағызып жіберу түрінде экологиялық заңнаманың бұзушылықтарын анықтады.
Осыған байланысты облыстың Экология департаменті прокуратураның талабы негізінде тексеру жүргізді. Тексеру барысында рұқсат беру құжаттамасында көзделмеген ағынды суларды ағызуды жүзеге асыруда көрсетілген өрескел бұзушылықтар анықталды.
Департамент тексеру нәтижелері бойынша коммуналдық кәсіпорынға анықталған бұзушылықтарды жою туралы нұсқама беріп, әкімшілік құқық бұзушылық туралы іс қозғады.
"2026 жылғы 14 тамыздағы сот қаулысымен коммуналдық кәсіпорын ӘҚБтК-нің 328-б. 1-б. бойынша 174 млн теңге мөлшерінде айыппұл салумен әкімшілік жауаптылыққа тартылды", — деп жазылған хабарламада.
Сот актісі заңды күшіне енді.