Шығыс Қазақстан облысындағы Меновное және Аблакетка елді мекендерінде тұрмыстық қатты қалдықтардың рұқсатсыз үйінділері анықталды. Бұл туралы Qazaqyia.kz порталы Polisia.kz басылымына сілтеме жасап хабарлайды.
Тексеру іс-шаралары «Таза Қазақстан» республикалық экологиялық акциясы аясында өтті. Оларды Шығыс Қазақстан облысы полиция департаментінің қызметкерлері облыстық мамандандырылған табиғат қорғау прокуратурасымен бірлесіп жүргізді.
Меновное және Аблакетка елді мекендерінің аумақтарын тексеру кезінде рұқсатсыз қоқыс үйінділерінің орналасу фактілері анықталды. Полиция мұндай қалдықтар өңірдің санитарлық жағдайы мен экологиялық ахуалына теріс әсер ететінін атап өтті.
Жүргізілген жұмыс қорытындысы бойынша жергілікті атқарушы органға абаттандыру және қоршаған ортаны қорғау саласындағы құқық бұзушылықтарға ықпал ететін себептер мен жағдайларды жою туралы ұсыныс енгізілді.
«Шығыс Қазақстан облысы полиция департаменті экологиялық талаптарды сақтау және тазалықты ұстау әрбір азаматтың міндеті екенін еске салады», — деп хабарлады ведомстводан.
Полиция экологиялық құқық бұзушылықтарды анықтау және жолын кесу жұмыстары мүдделі мемлекеттік органдармен бірлесіп тұрақты негізде жалғасатынын қосты.
Бұған дейін «Курсив» Астанада бүгінгі күні рұқсатсыз қоқыс үйінділерінің 99 учаскесі анықталғанын хабарлаған болатын. Оның 55-і жойылды, тағы 44 учаскеде жұмыстар жалғасуда.