Ақтөбеде Шалқардағы жаппай төбелес кезінде қаза тапқан 17 жастағы Алихан Жәнібековті өлтіру ісі бойынша жарыссөздер өтіп жатыр. Мемлекеттік айыптаушы сотталушыға сегіз жыл бас бостандығынан айыру жазасын тағайындауды сұрады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жасөспірімдер топтары арасындағы төбелес 2026 жылдың наурыз айында болған. Алихан пышақ жарақатын алып, қаза тапқан. Айыптау нұсқасы бойынша, сотталушы қылмысты алдын ала жоспарлап, ол үшін Оралдан Шалқарға келген. Алайда ол өзінің кінәсін мойындамайды: пышақты өзін-өзі қорғау үшін алғанын айтады.
Қаза тапқан жасөспірімнің анасы Рауан Ниязмаганбетова соттан сотталушыға 20 жыл бас бостандығынан айыру жазасын тағайындауды және отбасына материалдық және моральдық зиянды өтеуді сұрады.
«Менің балам жоқ болғанына тура 188 күн болды. Осы 188 күнде қаншама қайғыны бастан кештік, жыламаған бір күніміз жоқ», — деді ол сотта.
Мемлекеттік айыптаушы Усман Орынбасарулы сотталушыны Қылмыстық кодекстің 99-бабының 2-бөлігінің 9 және 14-тармақтары бойынша кінәлі деп танып, оған орташа қауіпсіздік мекемесінде жазасын өтейтін сегіз жыл бас бостандығынан айыру жазасын тағайындауды сұрады. Іс бойынша үкім әлі шығарылған жоқ.
Бұған дейін Kursiv.kz жасөспірімнің төбелестен кейін қаза тапқаны және қылмыстық тергеудің басталғаны туралы жазған болатын.