Sergek Group бас директоры Евгений Ким такси жүргізушілерінің тәуекел-рейтингін қалыптастыру үшін жасанды интеллектті қолдануды ұсынды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Ким бұл ұсынысты Астанада өткен «Қазақстандағы қалалық мобильділікті дамыту» II жылдық форумында жасады. Іс-шараға мәжіліс депутаттары, профильді министрліктердің өкілдері және тасымалдау нарығының қатысушылары қатысты.
Таксомоторлық тасымалдарды реттеуге арналған панельдік сессияда сөйлеген Ким жасанды интеллект көліктегі қауіпсіздіктің міндетті элементіне айналуы керек деп мәлімдеді — дәл қауіпсіздік белдіктері мен ABS жүйесі сияқты.
Оның айтуынша, сала бұзушылықтар мен жол-көлік оқиғаларынан кейін жазалаудан апаттардың алдын алуға көшуі қажет. Қазіргі уақытта қауіпсіздік шараларының көпшілігі оқиғадан кейін қолданылады: айыппұл, тергеу немесе жүргізуші куәлігінен айыру. ЖИ, Кимнің атап өтуінше, ертерек араласуға мүмкіндік береді — тәуекелді болжау және оны ықтимал апатқа дейін төмендетуге көмектесу.
Жүйе жүргізушінің мінез-құлқының бірнеше параметрлерін бір уақытта талдай алады: жүргізу стилі, кенет үдеулер мен тежеулер, жылдамдықты асыру, шаршау белгілері, ауысым ұзақтығы, ауа райы жағдайлары және жолдың жекелеген учаскелерінің апаттылығы. Осы деректер негізінде нақты жүргізушіде немесе көлік құралында ЖКО ықтималдығы артқанын анықтауға болады.
Ким жүргізушілердің тәуекел-рейтингі тұжырымдамасына жеке тоқталды. Бүгінде жолаушылар пікірлер бойынша рейтингті көреді, онда салонның тазалығы, сыпайылық және жол жүру жайлылығы ескеріледі. Сонымен қатар, оның айтуынша, жолаушы жүргізушінің нақты қауіпсіздік деңгейі туралы ештеңе білмейді.
Sergek Group компаниясында ЖИ пікірлерге емес, фактілерге негізделген объективті тәуекел рейтингін қалыптастыра алады деп санайды. Есептеуге ЖҚЕ бұзушылықтар тарихы, агрессивті жүргізу, кенет маневрлер жиілігі, түнгі уақытта жұмыс істеу, шаршау белгілері және еңбек пен демалыс режимін сақтау кіруі мүмкін.
Нәтижесінде әрбір жүргізуші нақты уақыт режимінде жаңартылатын динамикалық тәуекел профилін ала алады.
Кимнің пікірінше, мұндай тәсіл нарықтың барлық қатысушыларына пайдалы болуы мүмкін. Жолаушылар қауіпсіз сапарға сене алады, агрегаторлар апаттылық пен беделдік тәуекелдерді төмендете алады, сақтандыру компаниялары тарифтерді дәлірек есептей алады, ал мемлекет жол қозғалысы қауіпсіздігін арттырудың қосымша құралын алады.
«Бұрын технологиялар салдарды тіркейтін. Бүгін AI тәуекелді болжай алады. Ал ертең ақылды қаланың міндеті ЖКО-дан кейін кінәлілерді табу емес, ЖКО-ның өзіне жол бермеу болады», — деп атап өтті Евгений Ким.
Компанияда 2026 жылдың мамырында Sergek Group ЖИ негізінде жол тәуекелдерін алдын ала анықтау платформасын ұсынғанын еске салды. Егер бұл әзірлема ең алдымен уәкілетті органдармен жұмыс істеуге бағытталған болса, тәуекел-рейтинг коммерциялық тасымалдау нарығына — агрегаторларға, таксопарктерге және сақтандыру компанияларына арналған.