16 шілдеде Абай облысындағы «Семей орманы» мемлекеттік орман табиғи резерватының Камышен орманшылығында басталған орман өрті 28 шілдеде толығымен сөндірілді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қазақстан Республикасы Экология және табиғи ресурстар министрлігінің мәліметінше, өртті сөндіруге Экология министрлігі, Төтенше жағдайлар министрлігі және Қорғаныс министрлігінің күштері мен құралдары жұмылдырылды.
Ведомство өрттің сөндірілуіне барлық қатысқан қызметтердің бірлескен және үйлесімді жұмысы арқылы қол жеткізілгенін атап өтті.
Еске сала кетейік, Абай облысындағы орман өрті 16 шілдеде басталған болатын. Өртпен күресу үшін аймаққа ТЖМ, ІІМ, ҰҚК, Қорғаныс министрлігі, орман мекемелері, жергілікті атқарушы органдар және Денсаулық сақтау министрлігінің күштері мен құралдары жіберілді.
Облыс әкімдігінің деректері бойынша, өрт сөндіруге 769 адам, 191 бірлік жерүсті техникасы және сегіз тікұшақ қатысты. Авиация 319 рет су шашып, өрт ошағына барлығы 709 тонна су жеткізілді.
Өрт сөндірушілердің жұмысын шілде айындағы төтенше ыстық, өрт қауіпінің жоғары сыныбы және жердің қол жетпейтін қиындығы қиындатты.
Экология министрлігі өрттің толығымен сөндірілгенін растады және алдағы уақытта өрт қауіпсіздігі шаралары күшейтілетінін мәлімдеді.