Алматы полициясы Сайран жағалауында микрофонға балағат сөздер айтқан ер адам мен әйелді анықтады. Әкімшілік іс материалдары сотқа жіберілді, деп хабарлады қалалық полиция департаменті. Бұл туралы Qazaqyia.kz порталы Kursiv Media басылымына сілтеме жасап хабарлайды.
Тергеуге әлеуметтік желілерде жарияланған видео себеп болды. Жазбада көше музыканттары қоғамдық орында өнер көрсету кезінде балағат сөздер қолданған.
Бейнеролик тарағаннан кейін полиция қызметкерлері оқиғаға қатысушыларды анықтап, оларды бөлімге жеткізді.
Ер адам мен әйелге қатысты ұсақ бұзақылық фактісі бойынша әкімшілік іс қозғалды.
«Жиналған материалдар сотқа жіберілді. Қоғамдық орындарда балағат сөздер айту, айналадағыларға құрметсіздік көрсету және қоғамдық тәртіпті бұзатын басқа да әрекеттер заңнамаға сәйкес жауапкершілікке әкеп соғады», — деп хабарлады полиция.
Әкімшілік кодекстің 434-бабы бойынша ұсақ бұзақылық үшін 20 АЕК мөлшерінде айыппұл (2026 жылы 86,5 мың теңге), 20-дан 60 сағатқа дейін қоғамдық жұмыстар немесе бес тәуліктен 15 тәулікке дейін әкімшілік қамауға алу жазасы қарастырылған.
Іс бойынша түпкілікті шешімді сот қабылдайды.
Бұған дейін «Курсив» Сайрандағы көше орындаушылары микрофонға балағат сөздер айтып, оларды түсіріп жатқан әйелді тоқтатуды талап еткен видео әлеуметтік желілерде пайда болғанын жазған. Сонда полиция тексеру басталып, қатысушылардың жеке басы анықталғаннан кейін олардың әрекеттеріне құқықтық баға берілетінін мәлімдеген.