Қытайлық Unitree G1 гуманоид роботы Пемба Эквадордағы Чимборасо жанартауына (биіктігі 6263 метр) сәтті шығып, тарихта алғаш рет алтымыңдық шыңды бағындырған робот атанды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Робот кәсіби альпинистердің өзіне қиындық тудыратын күрделі тау маршрутын еңсерді. Жолдың соңында ол қуаныштан билеп кетті. Шыңға шығу 16 сағатқа созылды. Пемба қарлы беткейлерде (еңісі 30 градустан аз) өздігінен қозғалды, ол арнайы жылы күртеше, альпинистік аяқ киім және қауіпсіздік жүйесімен жабдықталған. Тік және қауіпті жерлерде инженерлер тобы оны қолдарымен көтеріп өтті.
Пабло Беранг Бомаре (Geologic Dome компаниясының негізін қалаушы) жетекшілік еткен инженерлер тобы жетектердің төзімділігін, тұрақтандыру алгоритмдерін және электрониканың биік тау жағдайында жұмыс істеу қабілетін сынады. Болашақта мұндай роботтарды қорықтарды бақылау, жабайы табиғатты браконьерлерден қорғау және құтқару операциялары үшін пайдалану жоспарлануда.
Енді Пемба мен оның әзірлеушілері әлемдегі ең биік шың – Эверестті бағындыруды жоспарлап отыр. Алайда, Непалда роботтардың экспедицияларын реттейтін заңдар әлі жоқ болғандықтан, Эверестке штурм кейінге қалдырылды.