Ұлыбританияның қайырымдылық ұйымы RNLI (Корольдік ұлттық қайық құтқару мекемесі) Ла-Манш бұғазында баспана іздеушілерді құтқарып, оларды Ұлыбритания жағалауына жеткізгені үшін түбегейлі оңшыл арандатушылардың шабуылына ұшыраған соң қауіпсіздік шараларын күшейтті. Бұл туралы Qazaqyia.kz порталы The Guardian басылымына сілтеме жасап хабарлайды.
Қайырымдылық ұйымының басшылары еріктілерге егер RNLI логотипі бар киім кию оларды қауіпке ұшыратуы мүмкін деп есептесе, ондай киімді кимеуді қарастыруға кеңес берді. Сондай-ақ оларға қауіп сезінсе, дүкендерді немесе қайық станцияларын жабуға құқылы екендіктері айтылды.
Соңғы бірнеше күнде Англияның оңтүстік жағалауындағы RNLI базаларының айналасында қауіпсіздік күштері айтарлықтай көбейді, полиция мен жеке күзетшілер кейбір аумақтарды бақылап отыр.
Пуолдағы қайырымдылық ұйымының штаб-пәтерінде RNLI еріктілерінің қаза тапқандарына арналған мемориалдық мүсін мен ұйымның 200 жылдығына орай отырғызылған раушан гүлзарының айналасына қоршаулар орнатылды. Штаб-пәтерге қарайтын бақылау алаңы жабылды.
RNLI жексенбі күні баспана іздеушілерді тасымалдаған қайық Портсмутқа жеткізілген құтқару операциясына қатысқаны үшін түбегейлі оңшыл белсенділердің шабуылдарына қарамастан, Ла-Маншта баспана іздеушілерді құтқаруды жалғастыруға уәде берді.
Алайда жексенбідегі наразылықтан кейін RNLI бас атқарушы директоры еріктілерге электрондық хат жолдап, қауіпсіздік процестері қайта қаралып жатқанын мәлімдеді.
Еріктілерге RNLI киімін кимеуді қарастыруға кеңес берумен қатар, қайық станцияларының жанындағы адамдардың жеке куәлігі болмаса, оларға қарсылық білдіру ұсынылды. Сондай-ақ өздерін жайсыз сезінсе, жұртшылықпен сөйлеспеуге кеңес берілді.
Жексенбіде баспана іздеушілер түскен жерге жақын орналасқан Портсмут қайық станциясының қызметкерлеріне жұртшылық өкілдері келіп, RNLI әрекеттерін түсіндіруді талап етті.
RNLI жұмысшылардың интернетте және физикалық түрде қорлыққа ұшырағанын, сондай-ақ қайырымдылық ұйымы баспана іздеушілерді жағалауға шығарғаннан кейін оларды үйлерге орналастырды немесе жасырын жерлерге көшірді деген «негізсіз» қауесеттер тарағанын мәлімдеді.
RNLI еріктілерін, қызметкерлерін және ғимараттарын қорғауға үш полиция күші қатысты. Дорсет полициясы штаб-пәтердің қауіпсіздігін қамтамасыз етуге көмектессе, Хэмпшир полицейлері Портсмуттағы RNLI станцияларын патрульдеді.
Сассекс полициясы да «RNLI еріктілеріне қатысты қорлайтын және қорқытатын пікірлерді» тергеп жатыр. Жексенбідегі операцияға қатысқан кейбір RNLI экипаж мүшелерінің суреттері әлеуметтік желілерде жарияланып, олар Ұлыбританияға «басып кіруге» қатысқан деп айыпталды.
Сәрсенбі күні Пуолдағы RNLI штаб-пәтерінің сыртында Poole Patriots және Hampshire Resistance мүшелерін қоса алғанда, шамамен 50 наразылық білдіруші жиналды.
Наразылық жетекшілері әйелдерге зорлау дабылдарын таратып, олар RNLI әкелген еркектерден қауіп төніп тұр деп мәлімдеді және халықты қайырымдылық ұйымына қайырмалдық беруді тоқтатуға шақырды.