Риелторлық қызметті реттеуге арналған заң жобасы Құрылтай қарауына ұсынылды. Бұл туралы Qazaqyia.kz порталы Sputnik Қазақстан басылымына сілтеме жасап хабарлайды.

PANA Ұлттық риелторлар палатасының мәліметінше, бүгінде риелторлық қызмет нарығында шешімін таппаған бірқатар мәселе бар.

Нарықтағы негізгі мәселелер

Палата атап өткен шешілмеген мәселелер қатарында:

  • 01риелторлардың бірыңғай мемлекеттік тізілімінің болмауы;
  • 02мамандардың біліктілігі мен қызмет көрсету сапасына қойылатын ортақ талаптардың жоқтығы;
  • 03қызмет құнының ашық көрсетілмеуі;
  • 04клиенттердің құқықтарын қорғау тетіктерінің әлсіздігі.

«Қазіргі таңда клиент комиссияның қалай есептелетінін, бұл сомаға нақты қандай қызметтер кіретінін және құқықтары бұзылған жағдайда қайда жүгіну керектігін біле бермейді», – дейді сарапшылар.

Кәсіби стандарт әзірленеді

Заң жобасы аясында риелторлық қызметтің кәсіби стандарты да әзірленеді. Оның негізгі мақсаты – мамандарға қойылатын талаптарды белгілеу және көрсетілетін қызметтердің сапасын нақтылау.

PANA Ұлттық риелторлар палатасының вице-президенті Әсет Айтбаевтың айтуынша, енгізілетін өзгерістердің басты нәтижесі – клиент үшін қызмет көрсету тәртібінің барынша түсінікті әрі ашық болуы.

«Атап айтқанда, маманды алдын ала тексеру мүмкіндігі, қызметтің құны мен мазмұнын алдын ала түсіну және құқықтары бұзылған жағдайда оларды қорғаудың нақты әрі түсінікті тетігі болуы керек», – деді Айтбаев.

Сертификаттау және тізілім

Айта кетері, PANA бүгінде риелторларды прокторинг арқылы онлайн сертификаттаудың пилоттық жобасын іске қосты. Сертификаттау үшін 1 000-нан астам сұрақтан тұратын база әзірленген.

Сонымен қатар ұйым мамандардың ашық тізілімін қалыптастырып, кәсіби оқыту шараларын бастаған.