Ресейдің тәуелсіз «Новая газета» газеті биліктің қысымына байланысты жабылатынын хабарлады. Бұған дейін билік басылымның аға редакторының үйін тінтіп, жыл басында журналистерінің бірін қамауға алған болатын. Бұл туралы Qazaqyia.kz порталы The Guardian басылымына сілтеме жасап хабарлайды.
«Новая газета» тоқтайды», — деді бас редактор Сергей Соколов жұма күні YouTube-те жарияланған бейнежазбада. «Ресей билігі – Ресейдің арнайы қызметтері – редакцияны жұмысын тоқтатуға мәжбүрледі».
Ресей Украинаға әскер жібергеннен бері кеңестік деңгейге жуық цензура енгізіп, тәуелсіз журналистердің басым бөлігін эмиграцияға мәжбүрледі. Ресейдегі тәуелсіз журналистиканың тірегі саналатын «Новая газета» Мәскеу тарапынан «шетел агенті» деп танылған, бұл белгі оппозицияны басу үшін қолданылады.
Соколов: «Новая газетаны өлтірді... 9 қарашада біз 30 жыл бойы өмір сүрген үйіміздегі шамдарды сөндіреміз. Серверлерді өшіріп, кетеміз», — деді.
Осы айда Соколовты жауап алуға шақырып, Ресей билігі оның әріптесі Олег Ролдугинге қатысты қылмыстық іс бойынша үйін тінтті. Ролдугин сәуір айында қамауға алынған болатын.
Ролдугин «компьютерлік ақпаратқа заңсыз қол жеткізу» деп айыпталып ұсталды, ешқандай мәлімет берілмеген. Ол өз кінәсін мойындамады, деп хабарлайды РИА мемлекеттік агенттігі.
«Новая газетаның» мәліметінше, Ролдугин үй қамауында сот алдында күтуде, оның мерзімі 10 қарашаға дейін ұзартылған.
Ресей 2022 жылдың ақпанында Украинаға шабуыл жасағаннан бері тәуелсіз БАҚ-қа қарсы қысымды күшейтті. «Новая газета» шабуыл басталғаннан кейін Ресей ішіндегі өндірісін қысқартты. Сол жылы билік оның медиа лицензиясын қайтарып алды.
Газеттің сол кездегі бас редакторы Дмитрий Муратов 2021 жылы басылымды басқару кезіндегі «сөз бостандығын қорғау жөніндегі күш-жігері» үшін Нобель бейбітшілік сыйлығын бірлесіп алған болатын.