Қытайдың шалғай провинциясында 28 шілде күні таңертең 20 минут аралықпен екі жер сілкінісі болды. Бұл туралы Qazaqyia.kz порталы Associated Press басылымына сілтеме жасап хабарлайды.
АҚШ Геологиялық қызметінің (USGS) мәліметінше, Цинхай провинциясындағы жер сілкіністері жергілікті уақыт бойынша сағат 11:16 және 11:34-те болған. Бірінші сілкіністің магнитудасы 5,7, екіншісінікі 5,8 болып, ошағы 10 шақырым тереңдікте орналасқан.
Құрбандар туралы дереу хабарлама түскен жоқ.
Қытайдың солтүстік-батысындағы Цинхай провинциясы сирек қоныстанған және мұнда жиі жер сілкінісі болады.
Мемлекеттік CCTV телеарнасының видеосында жер дірілдеген кезде жартастардан шаң көтерілгені көрсетілген.
Жер сілкіністері көршілес Ганьсу провинциясындағы ірі қалалардың бірі Ланьчжоуға да әсер еткен. Әлеуметтік желілердегі видеоларда қаладағы үйлердің ішінде шамдардың тербелгені көрінеді.