6 шілдеде Алматы, Ақтөбе және Қазақстанның тағы бірқатар қалаларында қолайсыз метеорологиялық жағдайлар (ҚМЖ) болжанады, деп хабарлады Қазгидромет. Бұл туралы Qazaqyia.kz порталы Kursiv Media басылымына сілтеме жасап хабарлайды.
Синоптиктердің мәліметінше, ҚМЖ Ақтөбе мен Алматыда, сондай-ақ түнде Астана, Атырау, Қостанай, Қарағанды, Жезқазған, Балқаш және Теміртау қалаларында күтіледі.
Мамандардың түсіндіруінше, қолайсыз метеорологиялық жағдайлар тымық ауа райы, әлсіз жел, тұман және температуралық инверсия үйлескенде пайда болады. Нәтижесінде ластаушы заттар атмосфераның жер бетіне жақын қабатында жиналып, ауа сапасының нашарлауына әкеледі.
Синоптиктер мұндай кезеңдерде денсаулыққа теріс әсер ету қаупі артатынын, әсіресе созылмалы аурулары бар адамдар үшін қауіпті екенін атап өтті.
Ауаның ластану деңгейіне желдің жылдамдығы, жауын-шашын, ылғалдылық және ауа температурасы да әсер етеді.
Тұрғындарға көшеде болу уақытын қысқартуға, әсіресе автомобиль жолдарының және басқа да ластану көздерінің жанында болмауға кеңес беріледі. Балалар мен жүкті әйелдерге ұзақ серуендерден бас тарту ұсынылады.
Тыныс алу органдары, жүрек-қан тамырлары жүйесі аурулары бар адамдарға және аллергиясы барларға қажетті дәрі-дәрмектерді өздерімен бірге алып жүруге кеңес беріледі. Мамандар ашық ауадағы физикалық белсенділікті шектеуді және мүмкіндігінше сабақтарды жабық үй-жайларға ауыстыруды ұсынады.
Бұған дейін «Курсив» Астанада және Қазақстанның барлық 17 облысында 6 шілдеде қауіпті ауа райы құбылыстары күтілетінін хабарлаған болатын.