2026 жылдың қаңтар-маусым айларында Қазақстанның әлем елдерімен шикізаттық емес тауарлар бойынша тауар айналымы $43,9 млрд-қа жетті. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Өткен жылдың сәйкес кезеңімен салыстырғанда бұл көрсеткіш 7,6%-ға немесе $3,1 млрд-қа өсті. Министрлік хабарламасында айтылғандай, экспорт айтарлықтай жоғары қарқын көрсетті: 2026 жылдың алғашқы алты айында қазақстандық кәсіпорындар сыртқы нарықтарға $15,2 млрд сомасына өңделген тауар жөнелтті, бұл бір жыл бұрынғы көрсеткіштен 17,6%-ға көп.
Экспорт өсімінің драйверлері
2026 жылдың алғашқы алты айында Қазақстанның шикізаттық емес және өңделген тауарлар экспортының өсімі жалғасты. Экспорт негізгі өсім драйверіне айналды. Бір жыл ішінде экспорттық жеткізілімдер $2,3 млрд-қа өсіп, $12,9 млрд-тан $15,2 млрд-қа жетті. Ал импорт 3%-ға өсіп, $27,9 млрд-тан $28,7 млрд-қа дейін ұлғайды.
Осылайша, 2026 жылдың қаңтар–маусым айларында шикізаттық емес және өңделген тауарлар экспорты импортқа қарағанда шамамен алты есе жылдам өсті. Сонымен қатар сауда балансының теріс сальдосы $14,9 млрд-тан $13,5 млрд-қа дейін қысқарып, $1,4 млрд-қа жақсарды.
Жеті жылдық динамика
Соңғы жеті жылдағы динамика да айқын көрінеді. 2019 жылдың қаңтар–маусым айларында шикізаттық емес және өңделген тауарлардың тауар айналымы $23,6 млрд, ал экспорт $7,72 млрд болды. 2026 жылдың қаңтар–маусымында бұл көрсеткіштер тиісінше $43,9 млрд және $15,2 млрд-қа жетті.
Осылайша, жеті жыл ішінде тауар айналымы шамамен 1,9 есеге, ал экспорт 97%-ға өсіп, екі есеге жуық артты. Сонымен қатар $15,2 млрд көлеміндегі қазіргі экспорт осы кезеңдегі ең жоғары көрсеткіш болды.