3 қарашада Алматы және Қазақстанның тағы 11 қаласында қолайсыз метеорологиялық жағдайлар (ҚМЖ) күтіледі. Бұл туралы Qazaqyia.kz порталы Kursiv Media басылымына сілтеме жасап хабарлайды.
Синоптиктердің деректері бойынша, ҚМЖ Қарағанды, Жезқазған, Балқаш, Теміртау, Орал, Атырау, Ақтөбе, Шымкент, Түркістан, Талдықорған, Алматы және Астана қалаларында болжанады.
Қолайсыз метеорологиялық жағдайлар дегеніміз не?
Қолайсыз метеожағдайлар тымық ауа райы, әлсіз жел, тұман және температуралық инверсияның қосылуынан туындайды. Мұндай ауа райында ластаушы заттар атмосфераның жер беті қабатында жинақталып, ауа сапасының нашарлауына әкелуі мүмкін.
Денсаулыққа әсері
Бұл кезеңдерде денсаулыққа теріс әсер ету қаупі артады, әсіресе созылмалы аурулары бар адамдар үшін. Ауаның ластану деңгейіне жел жылдамдығы, жауын-шашын, ылғалдылық және ауа температурасы да әсер етеді.
Тұрғындарға ұсыныстар
Тұрғындарға, әсіресе автожолдар мен басқа да ластану көздерінің жанында, көшеде болу уақытын қысқарту ұсынылады. Балалар мен жүкті әйелдерге ұзақ серуендеуден бас тартуға кеңес беріледі.
Тыныс алу және жүрек-қан тамырлары ауруларымен ауыратын адамдарға, сондай-ақ аллергиясы бар адамдарға қажетті дәрі-дәрмектерді өздерімен бірге ұстау ұсынылады. Ашық ауадағы дене белсенділігін шектеу, ал жаттығуларды мүмкіндігінше жабық үй-жайларға көшіру керек.