"ҚазАвтоЖол" ұлттық компаниясы қазақстандықтар жиі жүретін ақылы жолдардың тізімін жариялады, деп хабарлайды Sputnik Қазақстан. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Биыл он айда көліктер ақылы жолдармен 68 миллионнан астам рет жүріп өткен. Көлік қозғалысының басым бөлігі бес жолда тіркелген.
Ең жиі жүретін бес ақылы жол
- 01Алматы – Қонаев: 10,8 млн рет;
- 02Шымкент – Өзбекстан: 8 млн рет;
- 03Шымкент – Тараз: 5,6 млн рет;
- 04Тараз – Қайнар: 4,9 млн рет;
- 05Шымкент – Қызылорда: 4 млн рет.
"Бұл көрсеткіштер Қазақстанның оңтүстік және оңтүстік-шығыс өңірлеріндегі көлік қозғалысының қарқынды екенін көрсетеді. Аталған жолдар ірі қалаларды, маңызды көлік тораптарын және халықаралық дәліздерді байланыстырады", – дейді компания мамандары.
Орталық және солтүстік өңірлерде де қозғалыс қарқынды
Дегенмен, орталық және солтүстік өңірлердегі ақылы жолдарда да қозғалыс қарқынды. Атап айтқанда, Астана – Теміртау тасжолында 3,7 млн-ға жуық, Астана – Щучинск бағытында 3,4 млн, ал Қонаев – Талдықорған жолында 3,2 млн рет көлік өткен.
Бұған дейін үш ақылы жолда орташа жылдамдықты өлшеу жүйесі іске қосылатыны хабарланған болатын.