Қазақстанда иттерге қойылатын ең танымал есімдер – Ақтөс, Шарик және Рекс, ал мысықтар арасында Мурка, Муся және Барсик көш бастап тұр. Бұл туралы Qazaqyia.kz порталы Kursiv Media басылымына сілтеме жасап хабарлайды.
Экология және табиғи ресурстар министрлігі TAÑBA үй жануарларын есепке алудың бірыңғай ақпараттық жүйесіне сілтеме жасап, осындай деректерді келтірді.
TAÑBA жүйесіндегі жануарлар саны
Қазіргі уақытта жүйеде 400 мыңға жуық үй жануары тіркелген. Олардың басым көпшілігі – иттер мен мысықтар: 291 761 ит және 107 414 мысық.
Иттерге қойылатын ең танымал есімдер
Иттер арасында ең көп таралған есім – Ақтөс, оны 8 863 жануар иеленген. Екінші орында – Шарик (6 027 ит), үшінші орында – Рекс (5 409). Одан кейін: Тузик – 4 243, Лайка – 4 137, Арлан – 3 012, Мойнақ – 2 382, Алапар – 2 056, Барсик – 2 004 және Барбос – 1 963.
Мысықтарға қойылатын ең танымал есімдер
Мысықтар арасында Мурка есімі көш бастап тұр – 2 236 жануар осылай аталған. Одан кейін: Муся – 1 529, Барсик – 1 491, Мурзик – 842, Соня – 833, Рыжик – 721, Симба – 698, Алиса – 657, сондай-ақ Вася мен Кузя – әрқайсысы 604 жануардан.
Сирек кездесетін жануарлар мен ерекше есімдер
TAÑBA жүйесінде тек мысықтар мен иттер ғана емес, сонымен қатар сегіз қоян, төрт күзен, бір-бірден тасбақа, сәндік егеуқұйрық, ергежейлі шошқа, хомяк және капибара тіркелген.
Сирек кездесетін жануарлардың есімдері де ерекше. Атап айтқанда, жүйеде Айша атты тасбақа, Томпи атты хомяк, Библик атты ергежейлі шошқа, Финик атты сәндік егеуқұйрық және Борис атты капибара бар. Қояндар арасында Кембридж, Оксфорд, Рафинад және Снежинка тіркелген, ал күзендер – Пирожок, Умка, Кипиш және Жижа.
Электрондық паспорт
Жүйеде теңіз шошқалары, шиншиллалар, қояндар, маймылдар және кірпілер сияқты басқа да үй жануарларының түрлеріне арналған санаттар қарастырылған. Әзірге бұл түрдегі жануарлар базада жоқ.
TAÑBA-да үй жануарын тіркеу кезінде электрондық паспорт қалыптастырылады. Оған есім, тұқым, жыныс, туған күні, идентификациялық нөмір және иесі туралы мәліметтер енгізіледі. Цифрлық профильде вакцинация, стерилизация және басқа да ветеринарлық процедуралар туралы ақпарат сақталады.
Экология министрлігі бірыңғай цифрлық есеп жануарды тезірек идентификациялауға және оның жағдайы мен жүргізілген ветеринарлық процедуралар туралы өзекті деректерді алуға мүмкіндік беретінін атап өтті.
Бұған дейін «Курсив» eGov Mobile қосымшасында үй жануарының цифрлық паспорты қолжетімді болғанын жазған болатын. Құжатты «Цифрлық құжаттар» бөлімінен ашуға болады, сондықтан жануар иелеріне қағаз паспортты әрқашан алып жүрудің қажеті жоқ.