2026 жылдың 19 шілдесінен бастап қазақстандықтар QR-код арқылы банкаралық төлем жасай алады. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қазір бұл жүйеге мобильді қосымшалар арқылы халыққа қызмет көрсететін барлық банк қосылған. Заңнамаға сәйкес Банкаралық мобильді төлемдер жүйесі (БМТЖ) ел көлемінде ресми түрде 2026 жылғы 19 шілдеде іске қосылады.
Осы күннен бастап жүйеге қатысушы банк клиенттері телефон нөмірі арқылы басқа банктің клиенттеріне лезде ақша аударып, сатып алушы мен сатушы қай банк клиенті екеніне қарамастан, QR-код арқылы да тауар мен қызмет ақысын төлей алады.
Аударымдар мен төлемдер тәулік бойы нақты уақыт режимінде орындалады. БМТЖ кәсіпкерлерге жүйеге кірген барлық банктің клиенттерінен бір ғана QR-код арқылы қолма-қол ақшасыз төлем қабылдауға мүмкіндік береді.
Ол үшін жаңа жабдық орнатудың қажеті жоқ, қызмет қолда бар терминалдармен көрсетіле береді. Ал мобильді қосымшаларды жаңарту мәселесі бойынша қызмет көрсетуші банктің өзіне жүгіну қажет.
Ұлттық цифрлық қаржы инфрақұрылымына Ұлттық төлем жүйесінен бөлек, биометрияны сәйкестендіру платформасы, цифрлық теңге платформасы, ашық банкинг платформасы және Ұлттық антифрод-орталық кіреді.
Айта кетері, бүгінгі таңда Ұлттық төлем жүйесінде күніне шамамен 6,3 трлн теңге өңделеді. Айналымға 340 миллиардтан астам цифрлық теңге шығарылды. Ал биометриялық сәйкестендіру сервисі ай сайын 3,5 миллионға жуық сұранысты қабылдайды.
Антифрод-орталық өз жұмысын бастағалы 165 мыңнан астам алаяқтық оқиғалар мен өзге де заңсыз операцияларды анықтады. Олардың арасында қаржы пирамидалары мен заңсыз ойын бизнесіне қатысты қылмыстар да бар.