Қазақстан ресми түрде Оңтүстік Кореяның шетелдік жұмыс күшін тартуға арналған Employment Permit System (EPS) рұқсат беру жүйесіне қосылды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Қазақстан азаматтарын Корея Республикасына 2028 жылдан бастап жұмысқа тарту жоспарланып отыр. Министрліктің ресми хабарламасында айтылғандай, бұған дейін үкіметаралық өзара түсіністік туралы меморандумға қол қою, сондай-ақ Қазақстанда корей тілінен тестілеу өткізетін EPS-TOPIK орталығын ашу сияқты бірқатар ұйымдастыру шараларын аяқтау қажет.
Бұған дейін Қазақстанға келген кореялық сарапшылар делегациясы жүйені іске қосуға дайындық деңгейін бағалаған болатын. Атап айтқанда, EPS орталығын құру, корей тілі бойынша тестілеуді ұйымдастыру, кәсіби дағдыларды бағалау, медициналық тексеруден өткізу және азаматтарды Оңтүстік Корея заңнамасының талаптарын түсіндіру талаптары тексерілді. Сарапшылар Қазақстанның жүйеге қатысуға толық дайын екенін растады.
Министрлік мамандарының айтуынша, EPS жүйесіне қатысу Қазақстан азаматтарына мемлекеттер белгілеген рәсімдер шеңберінде Оңтүстік Кореяда ресми түрде жұмысқа орналасуға мүмкіндік береді. Жаңа тетіктің басты ерекшелігі – жұмысшыларды іріктеу делдалдар арқылы емес, тек ресми жүйе арқылы жүзеге асырылады. Үміткерлер корей тілі бойынша тест тапсырады.
Жүйеге тіркелу мерзімдері, үміткерлерге қойылатын талаптар, тестілеуден өту тәртібі және өзге де ақпарат министрліктің ресми сайтында жарияланады. Осыған байланысты министрлік мамандары іріктеуден жедел өткізуді ұсынатын делдалдарға ақша бермеу қажет екендігін ескертеді.
Айта кетейік, Қазақстан бөлек Е-9 жүйесіне Филиппин, Моңғолия, Шри-Ланка, Вьетнам, Таиланд, Индонезия, Пәкістан, Камбоджа, Қытай, Бангладеш, Шығыс Тимор, Непал, Мьянма және Лаос қатысады. Орталық Азиядан Қазақстанмен қатар Өзбекстан, Қырғызстан және Тәжікстан да қосылған.