Энергетика министрлігі электр энергетикасын дамытудың ұзақ мерзімді жоспарын әзірледі. Жоспарға сәйкес, 2028-2029 жылдары жаңа генерациялайтын қуаттарды кезең-кезеңімен іске қосу жоспарланған. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
2028 жылғы жоспарлар
2028 жылы 2 ГВт дәстүрлі генерацияны іске қосу көзделіп отыр. Жоспар аясында мынадай жобалар қарастырылған:
- 01Тараз, Атырау және Ақтөбе қалаларында бу-газ қондырғыларын салу;
- 02Екібастұз ГРЭС-2-нің №3 энергоблогын салу;
- 03"Қарағанды Энергоцентр" кәсіпорнында қазандық және турбоагрегат салу;
- 04"Kazakhmys Energy" БТЭЦ-інде қазандық пен турбоагрегат орнату;
- 05"Kazakhmys Energy" ЖЭО-да қазандық пен турбоагрегат орнату;
- 06Ақсу ГРЭС энергоблогын кеңейту және жаңғырту.
2029 жылғы жоспарлар
2029 жылы 2,3 ГВт дәстүрлі генерацияны іске қосу жоспарланған. Оның ішінде:
- 01Өскемен ЖЭО-да турбоагрегат пен қазандық агрегатын салу;
- 02Атырау ЖЭО-да бес газ-турбиналық қондырғыны іске қосу;
- 03"Батыс Пауэр" ЖШС-нің екі газ-турбиналық қондырғысын салу;
- 04Көкшетау, Семей және Өскемен қалаларында ЖЭО іске қосу;
- 05Екібастұз ГРЭС-3-тің бірінші блогын іске қосу.
Жаңартылатын энергетика
Сонымен қатар, ведомство жаңартылатын энергетиканың да дамып жатқанын атап өтті. 2028 жылы 2,2 ГВт, ал 2029 жылы 2,8 ГВт жаңартылатын энергия көздері нысандарын іске қосу жоспарланып отыр.
"Дәстүрлі және "жасыл" энергетикадағы ірі жобаларды іске асыру есебінен Қазақстанның генерациялайтын қуаты айтарлықтай артып, 2029 жылы энергетикалық жүйенің тұрақты профицитке шығуы күтіледі", - деп атап өтті Энергетика министрлігі.