Қазақстанда 2 қазанда ядролық және радиациялық инциденттерге жедел мониторинг жүргізу және ден қою орталығы ашылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Орталық Қазақстан мен АҚШ ынтымақтастығы аясында, АҚШ Энергетика министрлігінің Ядролық қауіпсіздік жөніндегі ұлттық әкімшілігінің (DOE/NNSA) қолдауымен құрылды. Ашылу салтанатына агенттік өкілдері, АҚШ елшілігінің және DOE/NNSA өкілдері қатысты.
Орталық радиациялық жағдайды бақылап, талдайды, жедел ақпарат алмасуды қамтамасыз етеді және ядролық және радиациялық инциденттер кезінде іс-қимылдарды үйлестіреді.
Агенттіктің деректері бойынша, оның жұмысы жедел және негізделген шешімдер қабылдау үшін дәйекті ақпаратты уақтылы алуды қамтамасыз етуге тиіс. Сондай-ақ орталық ұлттық ядролық және радиациялық қауіпсіздік жүйесінің ықтимал инциденттерге дайындығын арттырып, мемлекеттік органдар мен бейінді ұйымдардың өзара іс-қимылын жолға қоюға көмектеседі деп күтілуде.
Болашақта орталықтың техникалық және аналитикалық мүмкіндіктерін дамыту, ведомствоаралық өзара іс-қимылды жетілдіру, мамандар даярлау және олардың біліктілігін арттыру, сондай-ақ практикалық жаттығулар өткізу жоспарланып отыр.
Бұған дейін «Курсив» Нью-Делиде өткен «БРИКС плюс» саммитінде Қасым-Жомарт Тоқаев ядролық державаларды жаңа технологияларға байланысты тәуекелдерді азайту үшін жоғары деңгейдегі диалогты қайта бастауға шақырғанын жазған. Президент ұзаққа созылған қақтығыстар мен халықаралық қауіпсіздік жүйесінің әлсіреуі жаңа қару жарысы мен стратегиялық қателіктер қаупін арттыратынын ескертті.