Қазақстанда темекі бұйымдарын таңбалау құнын төмендету ұсынылып отыр. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қаржы министрлігі бір бақылау белгісі мен сәйкестендіру құралының бағасын 2,68 теңгеден 2,66 теңгеге дейін төмендетуге мүмкіндік беретін бұйрық жобасын жария талқылауға шығарды.
Мемлекеттік кірістер комитетінің пікірінше, бұл нарық қатысушыларының таңбалауға жұмсайтын шығындарын азайтуға мүмкіндік береді.
«Жобаны қабылдаудың мақсаты — тарифтік жүктемені азайту және темекі өнімдерін айналымға қатысушылар үшін Бірыңғай таңбалау операторының қызметтеріне объективті және қаржылық негізделген тарифті қолдану», — делінген құжатта.
Қаржы министрлігі сонымен қатар өзгерістің темекі бұйымдарын таңбалау және қадағалау жүйесінің жұмысына әсер етпеуі тиіс екенін атап өтеді.
Ашық НҚА порталында жарияланған жобаны талқылау 2026 жылғы 5 қазанға дейін жалғасады.
Таңбалау — бұл темекі қорабына салынатын арнайы цифрлық код. Ол арқылы тауардың қайда және қашан өндірілгенін немесе импортталғанын анықтауға, сондай-ақ оның сатылғанға дейінгі жолын қадағалауға болады.
Мұндай жүйе мемлекетке темекі өнімдерінің айналымын бақылауға, контрафактіні анықтауға және қажетті салықтарды төлемей темекі сатуды тоқтатуға көмектеседі.
Бұған дейін «Курсив» Қазақстанның темекі экспорты бойынша рекорд орнатқанын жазған болатын. 2026 жылғы қаңтардан наурызға дейінгі кезеңде ел 42,5 млн доллар сомасына темекі өнімдерін экспорттады.