Қазақстандықтар қараша айында ерекше жылы ауа райын күтіп отыр: орташа айлық температура бүкіл ел бойынша нормадан 2°С жоғары болады. Бұл туралы Qazaqyia.kz порталы Kursiv Media басылымына сілтеме жасап хабарлайды.
«Казгидромет» синоптиктері күздің соңғы айына арналған консультативтік болжамды ұсынды. Олардың деректері бойынша, қарашада ауаның орташа айлық температурасы Қазақстанның басым бөлігінде, сондай-ақ оңтүстік-шығыстың таулы аудандарында 0…-5°С деңгейінде болады. Ал елдің оңтүстік және оңтүстік-батыс бөлігінде термометр бағандары +1…+9°С-ты көрсетеді.
Жауын-шашын мөлшері барлық дерлік облыстарда норма шамасында болжанып отыр. Алайда нормадан артық жауын-шашын СҚО, ШҚО, БҚО, Павлодар, Қостанай, Ақмола, Ақтөбе, Алматы облыстарының жекелеген аудандарында, сондай-ақ Абай және Жетісу облыстарында түседі.
Еске салайық, 16 қазан, жұма күні Қазақстанның 16 өңірінде дауылды ескерту жарияланды. Синоптиктер тұман, жауын-шашын, тіпті қар, көктайғақ, үсік және қатты жел уәде етіп отыр. Бірнеше өңірде өрт қауіптілігінің жоғары және төтенше деңгейі сақталуда.
Бұған дейін «Курсив» Қазақстанда 2026 жылғы 15–17 қазанда жаңбыр, қар және түнгі аяздар күтілетінін жазған болатын. Шығыста температура −11 градусқа дейін төмендейді, ал оңтүстік пен батыста күндіз +25 градусқа дейін жылы болады. Жауын-шашын елдің басым бөлігінде өтеді. Шығыс пен оңтүстік-шығыста 15 қазанда кей уақытта қатты жаңбыр мен қар жауады. Шығыста сондай-ақ көктайғақ болжанып отыр.